Ayera mainta, minister di Naturalesa, Sr. Ursell Arends a tene un conferencia despues di e veredicto di Corte Superior pa stop desaroyo di Embassy Suites, di Natura NV, te ora cu tin e ontheffing cu ta condicion pa nan aanlegvergunning.
Arends a elabora riba e procedura y e diferencia entre un ‘aanlegvergunning’ y ‘ontheffing’.
El a cuminsa na splica con e procedura mester a cana, cual ta menciona cu tur proyecto cu impacto riba naturalesa mester un ‘ontheffing’. E ‘aanlegvergunning’ ta duna permiso pa haci algo, den e caso aki pa construi por ehempel. E ‘aanlegvergunning’ ta condicional na ‘ontheffing’ cual por ehempel ta tene cuenta cu especienan den nos naturalesa cu ta protegi y den e caso di Embassy tres marine bioloog a constata banda di e yerba di caña, diferente coralnan den e beach cu a pidi ‘aanlegvergunning’ p’e cual ta nifica cu e hecho ta cu Natura N.V. mester un permiso di excepcion(ontheffing). Arends a splica cu no ta tur construccion mester di un ontheffing, pero esaki si ta necesario ora ta trata di especienan protegi.
‘Ontheffing’ ta wordo duna door di e Minister di Naturalesa. Segun Natura, ‘ontheffing’ no ta conta pa nan, huez a dicta cu si. A splica tambe cu e ‘aanlegvergunning’ di Natura ta “voorwaardelijk” cual ta nifica cu sin ‘ontheffing’ e no ta valido, Arends a bisa.
Tambe Arends a informa cu dia 6 di juli, el a tene un reunion cu Natura y for di e desaroyador su banda a indica cu nan lo pidi ‘ontheffing’ solamente si Gobierno di Aruba garantisa cu e ta wordo aproba. Arends a bisa cu esey no ta aceptabel y a wordo rechasa. Durante e mesun reunion, Minister Arends a propone un solucion cual ta encera pa desaroya e beach na banda pazuid, e propuesta a wordo rechasa rotundamente y Natura a scoge pa corte y publicidad, segun Arends a bisa.
Den transcurso di siguiente simannan email a drenta cerca ministerio unda ta menasa cu un caso di daño y perhuicio contra Gobierno di Aruba, cual tampoco ta aceptabel mirando cu cualkier perdida di Natura ta resultado di consehonan legal ekiboca. “E pregunta critico den e caso aki e ora ta bira, kende a crea e impresion cu Natura unda nos lo por “fix” e permisonan aki?”, Minister Arends ta reacciona.
Pa termina e conferencia di prensa Minister Arends ta enfatisa cu e intencion no ta pa stroba desaroyo na Aruba, si no pa crea un desaroyo sostenibel cu lo beneficia nos bek den futuro. Esaki ta un precedente cu a wordo poni. Desaroyo no por cana su caminda independientemente di naturalesa.
Presente na e conferencia di prensa aki tabata un grupo di trahador di Embassy, kendenan tabata kier a dirigi algun palabra na minister Arends expresando nan preocupacion. Nan tin miedo cu lo perde nan trabao pa motibo cu e reservacionnan haci na Embassy ta bao mercadeo di un beach cual awo no ta existi y ta conociendo retraso. Tambe nan a critica cu tin otro desaroyonan ta tuma lugar sin cu ta pidi un ontheffing, of otro actonan cu ta daña naturalesa manera dumpnan clandestino na Aruba. Pa cu esaki, Arends a contesta cu e ta compronde nan preocupacion y el a bisa cu e no kier menasa pan di niun hende. Sinembargo, e ta haya cu pa hopi aña naturalesa a wordo neglisha y destrui, y awo a yega ora pa protege Aruba su flora y fauna. El a bisa cu e sentimento aki pa protege naturalesa tambe ta resona entre gruponan grandi di comunidad local cu a vocifera esaki. Tocante e dumpnan clandestino, Arends a bisa cu tambe ta responsabilidad di pueblo pa colabora cu maneho di desperdicio, bisando cu tur hende mester sa pa deposita nan desperdicio den bar’i sushi, y si nan haci esey, e ora lo ta sigura cu e desperdicio lo yega na e destinacion corecto pa wordo procesa debidamente.
Relaciona cu e caso di Aruba Birdlife Conservation, prensa a puntra Arends si e ta sostene e caso di ABC contra e desaroyo di Embassy. Arends a indica cu mientras cu e ta mantene bon contacto cu tur organisacion protector di naturalesa, pa su persona no ta bay riba si ta ABC, TurtugAruba of cualkier organisacion of instancia, sino cu como minister di Naturalesa, e ta cay bao su responsabilidad pa bin cu un maneho cu ta mara desaroyo na proteccion di naturalesa.
Presente tambe tabata un representante di Natura NV, kende a puntra Arends pakico asina diripiente a bin pidi un ontheffing, y a cuestiona pakico ta ofrece otro beach na lugar di esun cu a “priminti” originalmente pa Embassy. Arends a bisa cu e ontheffing tabata un condicion for di comienso, y cu esaki mester tabata duidelijk for di e aanlegvergunning. El a critica e abogadonan di e desaroyardonan kende segun e minister, lo a duna mal conseho legal door di laga e desaroyador kere cu por a bay door cu e construccion sin cu a obtene e ontheffing ainda.
Arends a indica cu ta diamars ultimo 5pm cu a ricibi e peticion pa ontheffing. E peticion a bay na e trahadornan di Departamento di Naturalesa kende lo mester evalua tur e informacion aki y duna un conseho na minister si ta otorga e ontheffing of no. Prensa a puntra Arends si e hecho cu Natura a papia publicamente riba e caso y e mal relacion cu tin cu e minister lo por tin un efecto riba e resultado di e evaluacion aki y e posibilidad pa Natura NV ricibi e ontheffing. Arends a indica cu esaki no lo ta e caso ya cu Departamento di Naturalesa ta traha segun su standardnan y cu e conseho lo ta basa solamente riba e maneho di naturalesa cu tin estableci caba. El a bisa cu e ta dispuesto pa bolbe sinta na mesa cu Natura NV pa yega na un solucion cu ta satisfactorio pa tur partido involucra, pero si a indica cu mester haci esaki di un manera profesional, cu comprension y respet pa regla y ley di Aruba.
Na final di e conferencia di prensa, Arends a keda atras pa scucha e grupo di trahador cu tabata presente kende tabata kier haya mas informacion y clarificacion riba e asunto.
Por lesa e vonnis di e caso aki riba pagina 5.
