Awe comunidad Colombiano na Aruba por celebra nan 213 aña di independencia cu un evento organisa pa Fundacion Petronio Alvarez Internacional y Fundacion DRECAA na Cas di Cultura for di 6or di atardi.
Awe durante e celebracion e comunidad ta bay tin e oportunidad di disfruta di e presentacion di diferente grupo di baile, cuminda y mas di e diferente regionnan di Colombia.
Fundacion Petronio Alvarez ta conta cu apoyo di Departamento di Cultura di Aruba (DCA), e Consulado di Colombia y Fundacion DRECAA cu tambe a uni cu e Fundacion Petronio Alvarez Internacional pa celebra e dia importante aki pa tur e Colombianonan
Amparo Angulo, representante di Fundacion DRECAA, tambe a extende su invitacion na henter e pueblo di Aruba, specialmente na e comunidad Colombiano na e isla pa pasa y celebra e dia di independencia di Colombia. “Nos kier invita e pueblo di Aruba, y specialmente e Colombianonan pa compaña nos dia 20 di juli pa celebra nos 213 aña di independencia,” el a remarca.
Nan ta gradici e gruponan di baila y di folklore cu ta preparando y organisando tur cos pa e celebracion aki ta uno espectacular y inolvidabel.
El a resalta cu entrada pa e evento di celebracion ta completamente gratis pa un y tur. Angulo a ratifica cu durante e celebracion ta bay tin diferente persona, y organisacion, cu ta bay presenta e cultura di Colombia y tur cu uni na e celebracion lo por disfruta di e cultura di Colombia y nan dushi gastronomia.
Aruba tin un cantidad di aproximadamente 22.000 pa 23.000 ciudadano cu ta forma parti di e comunidad di Aruba na unda por conmemora e dia aki cu diferente actividad, entre otro concierto di Integracion cu ta bay tuma luga mañan 21 di juli for di 8or di anochi na Plaza de Agradecimiento.
