Cuerpo di Polis di Aruba tabata man yen e dos ultimo dia aki, unda varios hecho lamentabel a tuma luga y 3 persona a perde nan bida den esakinan.

E prome caso a tuma lugar diamars anochi na momento cu Cuerpo di Polis di Aruba a informa mediante un comunicado di prensa cu pa mas o menos 22:55, central di polis a haya e notificacion di un drive by shooting na altura di ex-United Dinner na Driemasterstraat. E informacion a indica cu persona femenino mester ta tira abao y no tabata reaccionando.

Na yegada di polis ta pidi ambulance cu urgencia mirando e situacion di e victima.

Ambulance a yega na e sitio pero lamentablemente no por a haci nada mas pa e dama, y pa 11:55 Dr. Scholten a constata e morto di Nayibe Isabel Herrera naci na Aruba dia 22 september 1991 cu 31 aña di edad.

Na e sitio a presenta departamento di recherche, polis tecnico, slachtofferhulp y dokter forensico.

Polis tabata atento buscando e sospechosonan di e asesinato aki, y relaciona cu esaki, na altura di Aruba Juniors tambe a topa cu un auto blanco Toyota Yaris para y cu lo ta involucra den e caso aki. A confisca e auto pa mas investigacion.

Den e caso aki, Cuerpo Policial ta pidi na esnan cu a wak algo of sa algo pa yama e tiplijn di polis 11141.

Caso na Bushiribana

Ayera tambe Aruba a haya e noticia di dos morto mas. Cuerpo Policial a haya un hende homber cu no tabata dunando señal di bida banda di Bushiribana y otro curpa sin bida na un cas na Washington.

Mediante un comunicado di Cuerpo di Polis a informa cu diaranson despues di 6or di mainta, central di polis a haya e notificacion cu lo mester tin un auto para na Bushiribana y banda di dje lo tin hende homber abao na suela y no ta dunando señal di bida.

Pa motibo di e situacion aki ta despacha patruya di polis di biaha na e sitio di e sucedido. Na yegada di e patruya, ta constata cu en berdad tin un curpa sin bida banda di un auto.

Recherche, polis tecnico y dokter forensico ta presenta na e sitio pa cuminsa e investigacion. Alabes departamento di slachtofferhulp tambe a ser poni na altura.

Investigacion a continua na unda na prome instante no por a identifica e curpa. Debi di esaki a bay controla na ken e auto ta pertenece y asina a bay na e cas di e persona na ken e auto ta registra. Na e cas aki e agentenan topa cu e curpa sin bida di un dama den e cas.

Segun Polis a señala ayera atardi, e caso ta den pleno investigacion y no por informa cu exactitud kico por a pasa.

Di e dos persona aki nan a indica cu tabata trata di Jorge Miguel Garcia Moreno ken segun otro medionan di comunicacion a informa cu tabata traha como personal trainer den un gym conoci. Garcia Moreno tabatin 35 aña y a nace na Venezuela dia 20 di april 1988.

Tocante e dama, su nomber tabata Leilia Gregoria Contreras Romero y el a nace dia 01 augustus di 1974 na Aruba, tabatin 49 aña y tabata traha como fisioterapista na Saba.

Rumornan den medionan di comunicacion local no ta descarta cu por ta cu Garcia Moreno lo a asesina Contreras Romero y despues a bay te area di Bushiribana pa kita su mesun bida. Mientras tanto, esey no ta confirma te ainda y investigacion ta continua pa haya sa kico a sucede cu e dos persona aki cu a resulta morto.

Ta un lastima cu 3 persona a perde nan bida den menos di 24 ora na unda den un di e caso aki ta mustra cu armanan di candela ta sigui drenta e isla keto bay y hende iresponsabel ta usa nan cu un resultado fatal.

Tabata dia 3 di maart dia cu Cuerpo di Polis a anuncia e ponemento di containernan den conexion di accion pa entrega di arma, e dia ey nan a informa cu 8 arma di candela y 500 pida di municion a ser entrega den e container aki cu e keda habri pa un luna so, for di 4 maart te cu 4 di juni.

Mester considera un tipo di accion aki un poco mas extenso y mas efectivo na unda e pregunta ta surgi, di na unda e armanan di candela aki ta bin? Con nan ta drenta Aruba? Mientras tanto e sucesonan tristo manera esaki ta continua.

Con Aruba por sigui enfrenta mas problemanan social asina cu ta laga un mancha scur tanto den comunidad como den famianan afecta sea pa violencia riba caya of pa asesinato si esey ta loke a sucede cu e otro dos persona envolvi.