(NLTimes)—Un bes cu Parlamentario Mariëlle Paul ser hura como minister di Educacion Primario y Secundario, e Gabinete Hulanda lo consisti di mas hende muhe cu hende homber pa prome biaha. E Gabinete Rutte IV Demisionario tin un total di 29 minister y Secretario di Estado. 15 di nan ta hende muhe, segun NOS ta reporta.
Esey ta pone Hulandes den e grupo chikito di paisnan cu un mayoria di hende muhe den nan gobierno. Na comienso di e aña aki, tabatin 13 pais rond mundo den e grupo aki, incluyendo Spaña, Rwanda, Canada y Colombia. En averahe, menos di un kwart di ministernan rond mundo ta hende muhe, segun figuranan for di Nacionnan Uni.
Ora Gabinete Rutte IV a tuma oficina, ya caba e tabatin mas hende muhe politico den historia di parlamento Hulandes. Esaki tabata un meta di e Prome Minister saliente Mark Rutte. Paul ta bay sucede Dennis Wiersma, ken a retira despues di un serie di keho contra e ex-minister tocante su comportacion problematico.
Devika Partiman di Fundacion Stem op een Vrouw a yama e sucesion pa un hende muhe un bon señal. “Semper tin e riesgo cu un distribucion casi igual asina entre muhe cu homber no lo dura,” el a conta NOS. “Cu despues di un tempo, esaki lo cay back den patronchinan bieu di poni hombernan dilanti pa un trabao di minister of secretario di estado. Esey no ta pasando awo.”
Segun e grupo di interes Women Inc., pa tin mas hende muhe den e Gabinete lo tin dos efecto. “Prome, nan ta un ehempel pa otro. Si un mucha muhe mira e politiconan femenino para riba e plataforma importante aki, nan lo pensa, ‘hey, ami tambe por logr’e,” segun vocero Cecile Wansink a conta e locutor.
Segundo, miembronan di gobierno femenino tin mas chens pa haci politica cu ta promove igualdad entre genero, Women Inc. ta bisa. “Den e ultimo añanan, tabatin legislacion riba, por ehempel, e ceramento di e buraco salarial y e abolicion di temporada di reflexion mandatario pa abortus. Propuestanan cu hende muhe a trece dilanti y cu otro hende muhe a sostene.”
A pesar di e logro di e gobierno nacional, ainda hende muhenan no ta representa suficientemente den otro nivel di politico Hulandes. Aproximadamente 35% di miembronan den e Conseho di Ciudad ta hende muhe. Y un coalicion nobo forma despues di e eleccion Provincial tin e cantidad mas abao di hende den 12 aña. E Gobierno Provincial na Zeeland y Flevoland ta consisti di solamente hende homber. “Esey mientras politica local y provincial ta un bon luga pa talento politico cu por sigui crece pa un nivel nacional,” Partiman a bisa.
Politiconan femenino tambe ta enfrenta critica y acoso online mas frecuente compara cu nan ekivalente masculino. Vice Prome Minister y lider di D66, Sigrid Kaag, a bisa cu e “odio, acoso y menasa” cu el a enfrenta, y su efecto riba su famia tabata su motibo pa retira for di politica.
Ayera Corinne Ellemeet a bira e di cuatro politico femenino pa anuncia su retiro den dos siman. El a papia varios biaha tocante e “odio enorme riba red social” dirigi pa politiconan femenino en particular.
