Mientras temporada di reces ta duna nos politiconan nan descanso bon mereci, esaki ta parce nos un bon oportunidad pa dedica algun atencion na asunto cu ta di importancia pa maneho di nos pais en general, sin cu esaki necesariamente ta trata di tuma un posicion politico. De vez en cuando ta necesario pa dedica atencion na e panorama general aki, cu ta duna nos algun dato interesante y den cierto sentido preocupante.

Un promer vistazo lo mester ta e situacion general di nos poblacion, unda nos por constata cu desde 2021 nos tin e situacion unda nos poblacion practicamente no tin crecemento natural mas. En corto, crecemento natural den termino demografico ta e diferencia entre e cantidad di nacemento y cantidad di fayecimento.

Mientras na 2018 ainda e crecemento natural tabata 447, y na 2019 hasta 513, na 2021 esaki tabata solamente 55, y na 2022 esaki a baha te na 36. Pregunta: kico ta tumando lugar aki? Dos proceso cu ta duna efecto contrario: cantidad di nacemento a baha den e periodo desde 2018, di 1177 te na 915 na 2022; 266 nacemento menos den apenas cinco aña. Di otro banda, den ultimo dos aña e nivel di fayecimento a subi, y no den e aña di Covid (2020), sino na 2021 y 2022, unda e cifra tabata respectivamente 964 y 879. Den e añanan anterior e nivel di fayecimento no tabata surpasa 750.

Cu e tipo di tendencia aki, y si esaki continua, e consecuencia principal lo ta cu e influencia principal riba tamaño di poblacion lo ta e saldo di inmigracion vs emigracion. Kico ta anto e imagen den e categorinan aki? Desde 2018, por constata cu ta na e aña ey so tabatin mas hende a establece na Aruba, mientras cu desde 2019 te cu 2022, tur aña mas hende a bandona Aruba cu tabatin hende a establece aki.

Ta logico cu na 2020 nos a mira menos hende a bin biba na Aruba, pa e situacion di Covid; sin embargo nos ta mira cu ultimo dos aña cu ta di recuperacion economico fuerte, ainda tin mas hende ta saliendo for di Aruba cu tin ta drentando. Y, aspecto interesante, e gran mayoria cu ta sali ta persona di nacionalidad Hulandes naci na Aruba o na antiguo Antiyas, segun e categorianan maneha pa CBS. Remarcable ta tambe cu desde 2020 nos a mira un reduccion fuerte di nos poblacion, di riba 109.000 na 2018 y 2019, te na net riba 107.000 pa 2020 y e dos ultimo añanan.

Poniendo awor un banda un rato e aspecto demografico, kico esaki ta significa pa e desaroyo economico fuerte den ultimo dos aña? Cu en todo caso e recuperacion no tabatin mester di un fluho fuerte di persona di exterior. Esaki den sentido puramente estadistico ta implica cu a logra un aumento fuerte di economia, pues di GDP, cu un poblacion cu ta considerablemente menos di loke nos tabatin na 2019. Esaki ta significa anto un aumento fuerte di loke nos ta yama productividad laboral? A primera vista si, pasobra e registracion di cupo di trabao na SVb den e aña aki a yega back na e nivel di 2019, pero riba papel en todo caso nos tin un GDP mas halto na 2022 cu na 2019.

Pero tin otro factor cu ta hunga un papel. Esey ta cu nos tin un poblacion considerable di hende cu no ta registra, pasobra nan no ta na nos isla di manera legal ni legitimo. Con grandi nan influencia ta riba nos economia? Nos no sa, pasobra nan no ta registra na SVb, ni na Censo, ni na ningun otro instancia… Pero warda, gran parti di nan ta conoci, cu nomber y fam. Historicamente gran mayoria di stranhero ilegal na nos isla no a yega via lama, sino via aeropuerto. Nan datonan ta conoci na autoridadnan, pero nan no gusta papia di e asunto aki. Nan ta keda insisti cu tin un grupo grandi di ilegal aki, di cual un parti chikito a solicita status di refugiado, y e resto lo mester ta un gran misterio. Esey no mester ta asina, pasobra gobierno tin un bon impresion cuanto nan ta, y ken nan ta.

Awor, nos ta trece esaki dilanti, pasobra nos ta desea di crea ambiente negativo? No, pero si nos tin un poblacion no documenta asina grandi, cu ta biba aki y ta aparentemente logra sustenta nan mes, pues di algun forma ta aporta na nos economia, no ta bira tempo pa nos actualiza nos informacion demografico? Lo ta un eror bastante grandi si nos cifranan oficial ta mustra un caida den poblacion, unda na 2022 lo tabatin como 800 persona menos cu den e aña di crisis 2020, mientras cu esey por ta dunando nos un imagen eroneo, pasobra e forza laboral desconoci aki ta mas cu compensa pa e poblacion cu oficialmente ta como 2.000 persona menos cu na 2018…

Por ta anto cu nos ta maneha cifra cu sustancialmente ta dunando nos un imagen falso y irealistico di nos poblacion y economia.

E pregunta grandi ta con nos ta bay coregi e asunto aki, sin toca e problema di un eventual amnistia general pa e grupo aki. Caso contrario, nos lo mester mira accion di expulsion na un escala cu nos no a mira nunca, ni nos ta kere cu esey lo ta e caso. Ministro encarga cu labor y integracion a toca e tema aki caba recientemente. Sin tuma posicion den esaki, ta parce necesario pa nos politiconan cuminza atende e tema aki.

LJMADURO – 17-JUL-2023