‘Lubida regla’ ta mas… Regla cu excepcion…

E reciente problemanan cu a surgi na e proyectonan di hotel na tanto Eagle Beach como Sero Colorado, unda proceso legal di obhecion via corte a pone un paro por lo pronto na construccion, ta parce un problema di propio fabricacion di e actual gabinete. Un problema cu a surgi di e afan pa ‘gaña lubida regla’, envez di aplica regla, algo cronico den nos sistema gubernamental.

E partido mayoritario den e actual gabinete tabata e motor tras di e introduccion di e ley concerni (ROP), pa crea legislacion pa desaroyo teritorial, desde su inicio na e antiguo ministerio yama VROM na inicio di decada di 90 di siglo pasa. Por a spera un actitud mas positivo ora ta trata interes general den emision di propiedad publico den forma di tereno, y e corespondiente respet pa proceso di obhecion di ciudadania, sin embargo tanto aña despues ta e mesun partido cu ta hay’e den problema cu ley, pasobra no ta mantene tur hende, incluyendo nan mes, na loke ley ta stipula.

E afan pa crea condicion faborable pa comercio en general, incluyendo y sigur inversionista di exterior, mester conduci na reglamentacion faborable cu ta legitimo, pero nunca por consisti di violacion o en todo caso negligencia di stipulacion legal existente. Por lo tanto no por tin ningun hustificacion pa negligencia di ley. Aki ta unda ta cruza un linea cora cu, manera a sali na claridad awor, ta viola o neglisha derecho di ciudadano pa opone cierto plan cu ta contra nan interes, manera nan ta percibi esaki. Bo no por traha bunita ley dunando ciudadano oportunidad pa trece obhecion, pa despues pone tur esaki un banda, pasobra tin otro interes cu kier sirbi. Na cierto momento e falta di atende asunto gubernamental den e secuencia cu ley ta stipula ta bin di atras pa frustra e proceso indebido hiba desde e promer momento. Ta dificil pa bay bisa awor cu ta e ciudadanonan cu ta protesta tin e culpa; nan ta haci uso di nan derecho, sino nan no lo a haya, por lo pronto, razon di e huez cu ta atendiendo e caso. No ta sin mas un huez ta manda para proyecto; e tambe ta comprende cu ta hopi placa tin envolvi den esaki y cu e desaroyadornan den nan planificacion no a tene cuenta cu e tipo di contratiempo aki.

Pa esey por tin comprension sin cu e ta hustificacion. E pregunta clave aki ta: ken a bisa nan cu no tin e peligro di haya e tipo di problema aki? Ken a keda sin informa nan cu ta existi e procedimentonan legal aki, cu mester atende hustamente pa nan no bira problema despues? O acaso a bisa nan cu ‘esey no ta problema, nos ta handle esey’? Y ken a bisa esey, e abogadonan cu nan a contrata? O algun empleado publico di nivel halto, o algun ministro o su conseheronan a duna e conseho aki, pa no preocupa pa stipulacion den ley, pasobra ‘lo handle esey’?

Envez di haya un splicacion drechi di kico a pasa, nos ta haya henter un hustificacion mancaron, cu ta nos mester corda riba ‘interes di turismo pa nos economia’ atrobe. No cu nos ta ignora e interesnan ey, pero nos ta kere cu ta na su lugar pa informa tur inversionista, grandi y chikito, local o di exterior, debidamente tocante e asuntonan cu mester atende di e forma corecto, hustamente pa evita problema y perdida di tempo y placa na momento cu no ta anticipa e tipo di problema aki mas. E splicacion cu nos no ta haya ta: pakico semper den gobernacion, y specialmente den e circulonan mas halto di maneho y decision, ta purba aparentemente pinta e asunto mas positivo pa e inversionista, envez di duna nan bon cla di comprende kico ta e posible bottle-necknan cu por tin riba nan ruta? Ta e arogancia di poder ta papia na un momento asina, cu nan ta kere cu nan por suprimi cualkier malcontento o preocupacion cu por surgi for di ciudadano, cu ta haci esaki bira irelevante pa e inversionista, te dia cu e ripara di mal manera cu Aruba no ta un republica bananero, aunke e nivel politico por duna e impresion ey, sino un estado di derecho cu pa nos suerte no tabatin su origen na man di e mesun politiconan aki, sino den tradicion di derecho publico Hulandes? Tabatin un tempo cu nos mandatarionan tabata merece y haya e ‘beneficio di duda’ pasobra nan tabatin un educacion formal deficiente. Awendia ta dificil pa maneha e mesun excusa ey pa nos mandatarionan, pasobra mayoria di nan a bishita universidad, y esunnan di nivel. Pues nos mester supone cu nan sa masha bon kico nan ta haci, y cu nan tin suficiente conocimento di ley pa sa cu na algun momento menos faborable, e barco ta bay pega.

Cu e actual casonan den corte, di cual nos no por sa ainda kico ta bay ta e veredicto final, kico gobernacion por siña di tur esaki? Pa ta honesto: nada. Nos tin varios decada ta mira repiticion di e tipo di actuacion aki, unda ‘regla no ta pa cumpli; regla ta pa dobla nan’… Nos no mester ni menciona aki e palabra corupcion, pasobra nos no tin prueba palpable. Pero cu tin algo cu ta haci cu inversionista ta haya e siguranza cu nan no mester cumpli, esey ta sigur. E placa cu kier a spaar cu ‘horta short’ legal, awor ta bay na daño y perhuicio den retraso di construccion…