Den area di Malmok pa varios aña caba por tuma nota cu algun cas tin nan tereno dilanti drecha cu pavers y mata, cu ta parce cu e tereno ey tambe ta forma un parti adicional di e cas.
Tin hopi pregunta den comunidad tocante e topico aki, na unda cada dia por mira cu mas cas ta aplica e tecnica aki pa e cas bira mas grandi of pa haya un parkeerplats mas bunita cu landscaping; pero e pregunta ta si esaki ta permiti. Si e doñonan di e casnan aki ta drecha e tereno dilanti di e forma ey, esey kiermen cu ta sigui keda como un tereno publico, of e tereno ta bira di e doño di e cas?
E tema aki tin varios aña andando sin contesta di autoridadnan concerni, y doñonan di cas ta sigui traha nan cas manera nan gusto sin tene na cuenta cu reglanan of maneho. Lo ta bon pa departamentonan di gobierno encarga cu e parti aki mustra na comunidad con e maneho y reglanan di esaki ta, y si e pida di e tereno en cuestion ta forma parti di nan cas, nan mester paga algo extra?
Algun potret ta publico riba rednan social y otro ta di Bon Dia Aruba.
