Ayera mainta, Stichting Monumenten Fonds a informa cu nan a tene un kick-off meeting cu tur stakeholders envolvi pa e proyecto di restauracion di Cas Veneranda, cual a ser construi na aña 1936. Cas Veneranda den Wilhelminastraat a keda construi na 1936 pa Frederico Maximiliaan (Machi) Arends, cu tabata e consul di Spaña.
E arkitecto tabata e conocido bouwmeester Dada Picus, cu a bay te Cartagena Colombia pa haya inspiracion for di un edificio cu esposa di Machi, Maria Veneranda, tabata encanta cune y asina a bin Aruba bek pa construi e edificio cual awe ta conoci bou di e nomber di Cas Veneranda. Un di e casnan mas grandi na Aruba den e tempo ey construi den un estilo neobarroco Latinoamericano.
Aparte di tabata un vivienda akinan tambe tabata tin un flowershop, un luga pa bende ijscream y e consulado di Spaña. Durante añanan nobenta a converti e edificio den Papiamento restaurant. Despues cu e restaurant a sali di e edificio y esaki a keda bashi y na 2014 un candela grandi a destrui gran parti di e interior. Pa siguridad a cera e edificio cual pronto lo keda completamente restaura pa Monumentenfonds Aruba.
Na april minister di Asuntonan Economico, Comunicacion y Desaroyo Sostenibel, Geoffrey Wever den un comunicado di prensa a menciona cu despues di un proceso largo su ministerio den colaboracion cu Stichting Monumenten Fonds Aruba, famia Arends, Nationaal Restauratie Fonds y APFA a logra pa cuminsa e restauracion di Cas Veneranda.
Minister Wever a sigura cu e proyecto importante aki pa centro di Oranjestad a bira un realidad door cu hopi hende a duna nan ayudo y sosten y algun persona a traha super duro cu hopi determinacion pa por a logra esaki. Minister Wever a gradici coleganan minister, specialmente minister presidente Evelyn Wever-Croes pa su ayudo y sosten, Staten di Aruba y diferente departamento di Gobierno, manera DWJZ, Directie Financien, CBOS, Directie Cultuur, DOW y DIP.
Anne Witsenburg y Daphne Every di Stichting Monumenten Fonds Aruba desde inicio a kere den e proyecto aki y a traha incansablemente cu un pasion grandi y cu profesionalismo. Witsenburg y Every a traha riba e diseño, riba e indeling, riba e parti financiero, nan a percura pa busca fondonan Hulandes na 2% pa e restauracion y fondo na APFA pa yuda financia e compra y a negocia cu e doñonan di Cas Veneranda, esta famia Arends pa por a cera e acuerdo di compra.
Den e reunion di ayera a anuncia e oficina di e arkitecto cu ta bay keda encarga cu e proyecto aki e cual ta Hoevertsz Archidesign N.V.
