Un publicacion recien di National Geographic a pone Aruba como e pais cu temperaturanan averahe mas halto di henter Latino America.
Segun datonan proporciona pa e Portal di Conocemento tocante Cambio Climatico (CCKP pa su siglanan na Ingles – un centro di informacion, dato y herment relaciona cu clima pa Banco Mundial), reporta pa National Geographic, Surinam ta e pais mas caluroso di e region.
A traves di CCKP, e entidad ta comparti informacion tocante clima di e paisnan di henter mundo y tocante temperaturanan medio historicamente, entre otro informacion.
Segun datonan actualisa na 2021, Aruba tin e temperatura averahe di mas halto na Latino America, cu 29.03° Celsius.
Na di dos lugar ta Corsou cu un temperatura averahe di 28.11° Celsius, y na di cuatro lugar Sint Maarten, cu temperatura averahe di 27.87° Celsius.
E informe di Estado di Clima na Latino America y Caribe 2022, elabora pa Organisacion Meteorologico Mundial (OMM) ta adverti cu e temperatura den ultimo 30 aña a aumenta cu un promedio di 0.2° Celsius pa decada – y mas ainda na Mexico, unda e temperatura a aumenta casi 0.3° Celsius pa cada decada, y Caribe – e tasa mas halto registra den America Latino y Caribe desde comienso di e periodonan di medicion y referencia den añanan 1900.
Segun ThinkHazard, na Aruba e peliger di calor extremo ta clasifica como medio segun e informacion disponible. Esaki ta nifica cu tin un probabilidad di mas di 25% cu lo produci un exposicion prolonga na calor extremo, causando stress termico, al menos un biaha den proximo cinco aña. ThinkHazard ta un publicacion di Banco Mundial cu ta duna un vision general di e peligernan pa un sitio determina, cu mester tene na cuenta durante e diseño y ehecucion di un proyecto pa promove e resiliencia pa cu desaster y clima. E herment ta indica e probabilidad cu en distinto peligernan natural lo afecta e areanan di e proyecto y ta duna orientacion riba con pa reduci e impacto di e peligernan aki, y unda por haya informacion. E nivelnan di peliger indica ta basa riba datonan di peliger publica y proporciona pa un serie di organisacion priva, academico y publico.
Segun e ultimo informe di evaluacion di e Grupo Intergubernamental di Experto riba Cambio Climatico (IPCC, 2013), e emisionnan continuo di gasnan di invernadero ta bay provoca kentamento adicional, y sigur ta bay registra nivelnan extremo di temperaturanan halto di manera mas frecuente na mayoria di e zonanan di e planeta den proximo 50 aña. Nan ta recomenda pa diseña proyectonan den e zonanan aki cu ta resistente na e kentamento di e planeta a largo plaso.
