(AP) – Creador di ChatGPT, OpenAI y Associated Press a bisa ayera cu nan a cera un acuerdo pa e compania di inteligencia artificial distribui e archivo di noticia di AP.
“E acuerdo ta mira OpenAI licencia parti di e archivo di texto di AP, mientras AP ta bay usa e tecnologia y experticio di producto di OpenAI,” e organisacionnan a bisa den un declaracion conhunto.
No a revela terminonan financiero di e acuerdo.
OpenAi y otro companianan tecnologico mester ingeri cantidadnan grandi di trabao por escrito, manera buki, articulo di noticia y combersacionnan riba rednan social, pa mehora nan sistemanan di AI (inteligencia artificial) conoci como modelonan grandi di lenguahe. E lansamento aña pasa di ChatGPT a duna impulso na un boom den productonan di “AI generativo” cu por crea texto, imagen y otro medionan nobo.
E hermentnan a genera preocupacion tocante e propensidad pa difumina mentira cu ta dificil pa nota pa motibo di e dominio fuerte di gramatica y lenguahe humano di e sistema. Nan tambe a genera pregunta tocante te ki grado mester compensa e organisacionnan noticiero y otronan kende nan trabao, arte, musica y otro trabao a ser usa pa “train” e modelonan di AI.
Hunto cu organisacionnan di noticia, autornan di buki a busca compensacion pa uso di nan trabao pa train sistemanan di AI. Mas di 4mil escritor – entre nan Nora Roberts, Margaret Atwood, Louise Erdrich y Jodi Picoult — a firma un carta fin di luna pasa pa e CEOnan di OpenAi, Google, Microsoft, Meta y otro desaroyadornan di AI acusando nan di practicanan explotativo den construccion di chatbot cu ta “imita y regurgita” nan lenguahe, estilo y idea. Algun novelista y e comediante Sarah Silverman tambe a demanda OpenAI pa violacion di derecho di autor.
“Nos ta complaci cu OpenAI ta reconoce cu contenido noticiero basa riba hechos, imparcial, ta esencial pa e tecnologia den evolucion aki, y cu nan ta respeta e balor di nos propiedad intelectual,” segun un declaracion por escrito di Kristin Heitmann, vice-presidente senior di AP. “AP ta sostene firmemente un marco cu ta bay sigura cu ta protege propiedad intelectual y ta compensa creadornan di contenido hustamente pa nan trabao.”
Ambos compania a bisa cu nan tambe ta examinando “e uso potencial di casonan pa AI generativo den producto y servicionan di noticia,” maske no a duna detaye specifico. OpenAI y AP ambos ta “kere den e creacion y uso responsable di e sistemanan di AI aki,” segun e declaracion.
OpenAI ta bay tin acceso na noticianan di AP bayendo back te 1985.
E acuerdo cu AP ta valioso pa un compania manera OpenAI pasobra e ta provee un cantidad di material cu por usa pa proposito di training, tambe ta un proteccion contra perdida di acceso na e material pasobra demandanan a menasa su acceso na material, segun Nick Diakopoulos, profesor di estudio di comunicacion y ciencia di computer na Northwestern University.
“Pa protege contra cualkier decision di corte, talbes bo kier bay y firma acuerdonan di licencia pa asina bo ta garantisa acceso legal na e material cu bo mester,” Diakopoulos a bisa.
AP actualmente no ta usa ningun AI generativo den su noticianan, pero a usa otro formanan di AI pa casi un decada, incluyendo rapportnan di ganashi corporativo automatisa y pa recapitula algun evento deportivo. Tambe ta maneha un programa cu ta yuda organisacionnan di noticia local incorpora AI den nan operacionnan, y recientemente a lansa un buskeda di archivo di imagen impulsa pa AI.
E efectonan di e acuerdo por alcansa mas leu cu AP pa motibo di e tamaño di e organisacion y su lasonan profundo cu otro noticieronan, segun analista di industria di noticia, Ken Doctor.
Na momento cu AP a dicidi pa habri su contenido gratis riba internet den añanan 1990, a conduci na hopi compania di corant haciendo mescos, loke a “resulta di ta un idea hopi malo” pa negoshi di noticia, segun Doctor.
El a bisa cu nabega un “industria nobo dirigi pa AI ta profundamente incierto” y ta presenta riesgonan similar. “E industria ta hopi mas zwak awendia. AP ta den condicion OK. E ta stabiel. Pero e industria di noticia rond di dje echt ta luchando pa hala rosea,” Doctor a bisa. “Di banda positivo, AP tin e influencia pa haci un acuerdo asina y por traha cu editornan local pa purba evalua tanto e potencial como e riesgo.”
