Den dianan aki riba social media tin hopi discusion tocante construccion di Secret’s Hotel Baby Beach na unda minister di Turismo Dangui Oduber a reacciona riba esaki bisando cu “lo por ta bon pa bin cu un accion di firma pa wak cuanto ciudadano ta na fabor of contra di e proyecto aki.”

Manera Bon Dia Aruba a publica den su edicion di ayera, habitantenan di Sero Colorado mediante un comunicado di prensa a informa cu “LAR ta sostene argumento di habitantenan di Sero Colorado, plan di Secret’s no a cumpli cu exigencia minimo di bienestar.”

Den comunicado ta señala cu “Gobierno mester atende cu obhecionnan di habitantenan di Sero Colorado prome cu e proyecto di Three Rivers por continua. Esey tabata decision di hues administrativo, mr. de Haseth den su veredicto di 7 di juli ultimo. E grupo di habitantenan di Sero Colorado cu a entama casonan contra e proyecto di Three Rivers a bolbe haya rason di hues cu ‘Secrets’ no ta cumpli cu tur exigencia di bienestar (welstand). Como tal, minister pa Asuntonan General, Innovacion, Organisacion Administrativo, Infrastructura y Ordenanza Teritorial mester tuma e obhecion contra e permiso di construccion di e cambernan y bin cu un decreto nobo teniendo cuenta cu e exigencianan minimo aki, segun hues.

Dia 10 di juli ultimo, minister di Turimo Dangui Oduber a trece dilanti su opinion tocante e topico aki riba su Facebook page unda el a skirbi: “lo por ta bon pa bin cu un accion di firma pa wak cuanto ciudadano ta na fabor of contra di e proyecto aki cu lo crea un spin off economico.”

E reaccion di usuarionan riba e red social pa e post aki no a tarda na unda varios usuario a señala cu si un accion di firma lo tuma luga, nan ta di acuerdo pa firma na fabor di proyecto di Secret’s debi cu “bienestar di mayoria ta bay prome cu esun di un grupo di 4 hende so,” manera un usuario a comenta.

Tambe a bin dilanti personanan mencionando cu nan ta cla pa cuminsa cu e accion di firma pero e pregunta ta, con ta bay haci cu loke tin di haber cu proceso pa hendenan por haya trabou den proyecto aki? mirando cu den hotelnan high rise tambe ta hayando problema pa falta di personal.

Den aspecto huridico, un accion di firma no tin un base legal y si kier a tuma e iniciativa aki mester a haci’e for di comienso di e proyecto cu awor tin cuatro aña caba. Continuando cu e aspecto legal ta un hues di corte ta dicidi unda un accion di firma no ta bay cambia loke e hues a dicidi, na final kico ta bay ta e efecto di esaki?

Mester puntra na gobierno tambe unda ta para cu e hotel aki ta bay duna un spin off efect si no a duna di conoce estudionan cu por comproba esey? e hotel aki lo tin cinco restaurant y ta all-inclusive, ta cuanto hende ta bay come den otro restaurantnan di San Nicolas?

Redactor di Bon Dia Aruba a puntra minister Oduber si e accion di firma ta bay ta tuma luga di manera formal of si ta un sugerencia di minister so pero te e ciere di edicion aki redactor no a haya un contesta.

Igualmente, den comunicado reciente nan a señala cu minister a duna Three Rivers permiso pa construccion di un hotel na Sero Colorado dia 28 di mei 2020 y despues di a ricibi obhecion di e habitantenan a saca un decreto dia 9 di maart 2021, indicando cu e grupo no ta admisibel pa entrega obhecion. E habitantenan a haya toch rason di Corte di LAR dia 9 di februari 2022, esta cu nan tin tal derecho basa riba nan argumentonan y a destrui e decreto.

Den e sentencia ey di 9 februari 2022 a instrui e minister pa tuma un decision nobo basa riba e obhecion di e habitantenan. Riba 5 di mei 2022 y contra decision di corte minister, a bolbe decreta cu ta considera cu e obhecion di e habitantenan contra Secrets no tabata admisibel y no a tene cuenta cu loke corte dicta.

Minister a apela e sentencia di 9 di februari 2022 na Hof y dia 24 di mei 2023 Hof a confirma e decision di Corte y a sostene e sentencia di corte comun cu minister a frustra e obhecion di habitantenan y cu minister mester tin cu saca un decreto nobo y tene cuenta cu obhecion nan di habitantenan.

Manera ta conoci Three Rivers ta bisa di tin permiso pa traha den dos fase un hotel di 900 camber. E prome fase ta inclui e facilidadnan di lobby y restaurant y 600 camber, y ta mara na dos permiso di construccion.

E habitantenan atrobe a argumenta cu exito dilanti hues cu e plan di construccion no ta cuadra cu exigencia aceptabel di bienestar (welstand) stipula pa ley, particularmente e proyecto manera e ta diseña no ta cuadra den e ambiente, unda tin hopi residencia priva y ta afecta e paisahe.

Hues a considera cu gobierno, den e caso aki y a sentencia ariba 7 di juli 2023, cu minister no por a demostra cu berdad gobierno a tene cuenta cu e exigencianan aki pa e proyecto Secrets. Mas ainda, hues a haya cu gobierno no a haci suficiente pa balansa e interesnan y no por a demostra cu e plan di construccion ta cumpli cu exigencianan di bienestar, basa riba articulo di ley 22 di e BWV (bouw en woningverordening).