Donkey Sanctuary Aruba a realisa un hazaña cu tabata representa hopi stress pa nan miembronan pero finalmente nan a logra cumpli cu e meta di trece cuatro burico for di Boneiro cu e obhetivo di aumenta nan reproduccion.
Mediante un post riba e red social Facebook, Donkey Sanctuary Aruba a informa cu dia 10 di juli ultimo den oranan di mainta, 4 burico saludabel a bin for di Boneiro pa Aruba. Nan a splica cu nan a gara nan den naturalesa di e pais aki y durante dos siman a duna nan e cuido cu nan ta merece. Nan a test di sanger y cu hopi organisacion y cuido a pone cada un di nan den 4 haula den un boto di Marina y a dura aproximadamente 10 ora pa yega Aruba.
Rincon, Zumba, Curry y Pluto tin diferente edad caminda algun di nan den 15 luna lo por duna nan prome babynan na e comunidad di burico di Donkey Sanctuary Aruba.
Nan como fundacion ta encarga di e tarea aki for di 26 aña pasa y nan ta conta cu nan tabata sa cu e dia lo a mester a yega pa nan cuminsa cu un programa di reproduccion controla. Buriconan a yega Aruba mas di 500 aña pasa y na decada di 1970 a keda solamente 20 burico.
E genetica di e poblacion di burico akinan a duna como resultado cu hopi di nan ta nace cu problemanan di formacion, problemanan cardiaco of articular. P’esey durante hopi aña nan ta bin purba di haya un “sanger nobo” manera nan ta bisa. P’esey dia 10 di juli ta bay keda marca como un dia hopi special.
