Riba 25 di juni, Bon dia Aruba a publica un comunicado di Señor Albert Kock titula “Sayuri a perde su bida accidentalmente”. Den e publicacion aki, e abogado bin dilanti pa aclaria e hechonan di a caso, pa cual el a subraya cu e incidente tabata uno “accidental.” Awo, a abogado y su cliente ta expresa cu nan no ta di acuerdo cu e sentencia di 9 aña cu sospechoso I.P. a ricibi.
Kock y su cliente a apela e caso pa via di e castigo ey, cu segun e abogado, a ser dicidi despues cu Corte den Prome Instancia a husga e hoben sospechoso como un adulto y a dun’e un castigo di 9 aña mientras cu e tabatin 17 aña na momento di huicio.
Riba 10 di juli ultimo Corte Superior (Hof) a dicidi riba e apelacion. Hof ta diferencia cu Corte di Aruba y Hof si a aplica husticia di menornan. Hof ta mira base pa aplica husticia di menornan mirando e personalidad di e sospechoso I.P. y mirando e circunstancianan bao cual e delitonan a ser haci. For di e rapportnan di expertonan ta conclui cu I.P. for di un edad hopi hoben caba tabatin problema di comportacion, tambe cu e tin un inteligencia media (gemiddelde intelligentie) y cu mayoria bes e ta reacciona impulsivo sin pensa riba e consecuencianan.
E expertonan ta di acuerdo cu otro cu I.P. mester haya un tratamento obligatorio intensivo den un institucion cera. Hof ta mira cu cerca I.P. tin posibilidad pa desaroyo pedagogico. Hof ta constata tambe cu I.P. durante tratamento di e caso no a duna Hof un impresion di ta social-emocionalmente madura. Alabes Hof ta constata cu algun delito a ser haci den grupo di muchanan y cu no por exclui cu por tabatin peerpressure (groepsdruk) riba I.P.
Pa loke ta castigo, Hof ta impone riba I.P. un detencion hubenil di 4 aña. Fuera di e detencion hubenil ey, Hof ta impone riba I.P. un medida di 2 aña den un Institucion pa Hobennan (P.I.J.). E medida di P.I.J. ta bin despues di e 4 aña detencion hubenil y e P.I.J. por ser prolonga cu 2 aña mas si resulta necesario.
