Riba dia 11 di juli, Nacionnan Uni ta celebra e Dia Mundial di Poblacion. E tema di e aña aki tabata: “Los e poder di igualdad di genero: Elevando e voznan di muhe y mucha muhe pa habri e posibilidadnan infinito di nos mundo.”
Segun Nacionnan Uni a indica riba su website, loke muhe y mucha muhe kier ta importante. Nan ta conta pa 49.7 porciento di e poblacion global, y sinembargo, muhe y mucha muhe hopi biaha ta ignora den discusionnan riba demografia, cu nan derechonan viola den politicanan di poblacion.
E inhusticia penetrante aki ta tene muhe y mucha muhe fuera di scol, trabao y posicionnan di liderazgo; ta limita nan agencia y habilidad pa tuma decision tocante nan salud y bida sexual y repriductivo; y ta eleva nan vulnerabilidad pa violencia, practicanan dañino y morto maternal prevenible, cu un muhe muriendo cada dos minuut pa motibo di embaraso of duna luz.
Segun Nacionnan Uni, mester avansa igualdad di genero pa crea un mundo mas husto, resiliente y sostenible. E creatividad, recurso y poder di muhe y mucha muhe ta fundamental pa adresa retonan demografico y otronan cu ta menasa nos futuro, incluyendo cambio climatico y conflicto.
Na momento cu sociedadnan ta empodera muhe y mucha muhe pa eherce autonomia riba nan bida y curpa, nan y nan famia ta prospera, segun e rapport di UNFPA 2023 State of World Population ta ilustra.
UNFPA ta trece su data, experiencia y storianan pa sostene mucha muhe y muhenan rond mundo, y Dia Mundial di poblacion ta duna nos un oportunidad pa resalta e necesidad pa avansa igualdad di genero, pa yuda realisa e soñonan di tur 8 biyon di nos riba nos planeta.
Segun e datonan mas recien di CBS, di e poblacion total di Aruba, 50,264 ta hende homber y 56,475 ta hende muhe. Tin na Aruba 11,693 mucha muher y 12,296 mucha homber menor di 19 aña di edad.
