Na Gemeentehuis di Venray a tuma luga un recepcion di despedida pa Leontien Kompier como burgemeester di Venray. Tambe e municipio di Venray a despedi di “wethouder” Jan Jenneskens. Pa Sra. Kompier, esaki ta nifica tambe despedida dje den e funcion di burgemeester cu el a ocupa pa e ultimo 14 añanan. Entre e grupo di invitadonan tambe tabata presente Minister Plenipotenciario di Aruba mr. Ady Thijsen. Esaki debi cu Aruba y Venray ta den proceso pa yega na un forma di cooperacion concreto.
Pa es motibo ey den e programa tabata tin espacio pa Minister Thijsen por a dirigi algun palabra na burgemeester Kompier. Den su discurso Sr. Thijsen a cuminsa na bisa cu den su maneho pa bishita municipio y provincianan pa busca forma di cooperacion, Venray ta e prome municipio cu el a bishita:
“Mi a keda ricibi na un manera sumamente caluroso. Mi a sinti mi mesora na cas. Desde e prome encuentro aki na Venray mi a mira den Leontien Kompier un persona cu hopi amor pa e sector publico. Tambe tabata bisto desde e prome dia cu lo bay sondea posibilidad di cooperacion entre Venray y Aruba. Hopi lihe a bin riba e sector di apicultura. E hecho cu esaki ta hopi conoci na Venray a pensa di usa e experticio aki pa yuda engrandece e sector di apicultura na Aruba. Mientrastanto nos a drenta den contacto cu Universidad di Wageningen y durante di mi bishita di trabao na Aruba mi a hiba combersacion cu un di e imkernan mas grandi na Aruba. E informacion cu nos a ricibi for di e combersacionnan aki lo mester duna caminda pa cana pa mira con e sector aki na Aruba por wordo hisa na un nivel mas profesional ainda,” asina Minister Thijsen a bisa.
“Nos a papia aki na Venray tambe di un exposicion comun riba Carnaval. Tanto Venray y Aruba conoce un tradicion largo di celebracion di Carnaval. E similaridadnan aki nos kier trece hunto den un manifestacion comun di nos balornan cultural. No ta pornada cu na 2024 Aruba ta celebra 70 aña di Carnaval y ta e momento adecua pa e poblacion di Venray y vecindario cera conoci cu un pida tradicion Caribense,” segun Sr. Thijsen.
E mandatario a bisa di e ultimo lunanan a yega na conoce Leontien Kompier como un persona cu tin un cariño inmenso pa Aruba. Un persona unico y particular, segun Sr. Thijsen, cu na e ocasion special aki, a conduci pa cu den nomber di Aruba duna Burgemeester Kompier un regalo special. “Nos regalo ta un pintura di e artista Arubiano Elvis Tromp y cu ta ilustra un paisahe Arubiano, unda bo ta mira un cas tipico, e conocedo mata di Divi Divi y cadushi cu ta caracteristica pa Aruba. Mi ta spera cu e cuadra aki lo haya un luga special den bo hogar como un recuerdo na e contacto corto, pero intensivo entre mi persona y bo persona. Un contacto cu sigur no ta caba akinan,” asina Minister Thijsen a bisa.
Despues di su discurso Minister Thijsen a haci entrega di e regalo na Burgemeester Leontien Kompier di Venray. Burgemeester Kompier di su banda a gradici Minister Thijsen y Aruba pa e bunita regalo y palabranan expresa na su persona.
E potretnan ta cortesia di Arubahuis
