(AP) — Union Europeo ayera a aproba un acuerdo nobo riba privacidad di informacion personal di hende cu ta crusa e Atlantico, cu meta pa alivia preocupacion Europeo riba spionahe electronico na man di agencianan di inteligencia Mericano.
E Marco di Privacidad di Data entre UE y Merca tin un nivel adecua di proteccion pa data personal, segun comision ehecutivo di UE a bisa. Esaki ta nifica cu e ta comparable na e standardnan stringente di proteccion di data propio di e 27 nacionnan, pues companianan awo por us’e pa move informacion for di Europa pa Merca sin mester agrega seguridad adicional.
Presidente Mericano, Joe Biden a firma un orden ehecutivo na october pa implementa e acuerdo despues di alcansa un acuerdo preliminar cu presidente di Comision Europeo, Ursula von der Leyen. Washington y Brussels a haci un esfuerso pa resolve nan bataya di varios aña tocante e seguridad di data di ciudadanonan di UE cu companianan tecnologico ta warda na Merca despues cu a benta afo dos acuerdo anterior di transferencia di data.
Washington y Brussels pa largo tabata den disputa tocante diferencianan entre e reglanan estricto di privacidad di data di UE y e regimen comparativamente relaha na Merca, cu ta falta un ley federal di privacidad. Esaki a crea incertidumbre pa gigantenan tecnologico incluyendo Google y mayor di Facebook, Meta, treciendo dilanti e prospecto cu companianan tecnologico Mericano por tin mester di tene data Europeo cu ta usa pa avisonan enfoca pafo di Merca.
E campañador di privacidad cu a duna impulso na e retonan legal pa cu e practica, sinembargo, a rechasa e acuerdo mas recien. Max Schrems a bisa cu e acuerdo nobo a faya di resolve problemanan central y a priminti di reta esaki den e corte maximo Europeo.
Schrems a cuminsa e saga legal door di entrega un keho tocante e maneho di su data di Facebook despues di revelacionnan di whistleblower Edward Snowden un decada atras riba con gobierno Mericano a spiona riba data y comunicacion online di hende.
Yamando e acuerdo nobo un copia di esun anterior, Schrems a bisa cu su grupo basa na Vienna, NOYB, tabata preparando un reto legal y ta spera cu e caso ta bay ta back den Corte Europeo di Husticia pa fin di aña.
E marco, cu ta drenta na vigor awe, ta priminti reforsa salvaguardia contra abuso di coleccion di data y ta duna varios avenida pa compensacion. Bao di e acuerdo, acceso di agencianan di inteligencia Mericano na data ta limita na loke ta “necesario y proporcional” pa protege seguridad nacional.
Europeonan cu ta sospecha cu autoridadnan Mericano a haya acceso na nan data por keha cerca un Corte nobo di Revision di Proteccion di Data, componi pa huesnan nombra pafo di gobierno Mericano. E minimo pa entrega un keho ta bay ta “hopi abao” y no ta rekeri pa hende proba cu a haya acceso na nan data.
