“Mi wela a sacrifica pa Aruba tin un Watty Vos Boulevard y awor e no tin cas pa biba”

Redactor di Bon Dia Aruba a acerca un persona cu kier a duna di conoce e situacion cu su wela y su famia ta enfrentando for di varios aña caba, desde cu e famia a haya e notificacion cu mester sali for di nan cas debi cu un proyecto grandi di construccion tabata na caminda.

Pa motibonan di seguridad, Bon Dia Aruba no ta publica e persona su nomber, sino e historia cu e kier pa comunidad haya sa. Su wela y su famia a sacrifica tur loke nan tabatin y a sali for di nan mesun cas pa awor Aruba por disfruta di un caminda grandi cu tin e nomber di Watty Vos Boulevard, pero awor, nan no tin cas pa biba.

E persona aki a splica cu e historia a cuminsa rond di 20 aña pasa, tempo cu e tabatin 10 aña di edad. E famia a haya sa cu tabatin un proyecto pa crea un caminda grandi na Aruba cu lo a yuda cu trafico y cu durante añanan, diferente instancia y hende a cuminsa acerca e famianan cu tabatin terenonan den areanan unda e proyecto mester a tuma luga.

A acerca na e famia aki, na unda nan a bay di acuerdo pa bende nan tereno, un tereno eigendom cu un cas di tres camber, un baño, dos sala, un comedor, un cushina, dos patio; un di e terenonan mas grandi di Ponton cu no tabatin niun debe, manera ta e ta conta, cu durante añanan e proceso a tarda y na final nan a dicidi di yuda pueblo bendiendo nan cas y laga traha e caminda.

“Un dia, un familiar di mi a bin bisa mi cu nos tin cu muda na otro cas pasobra nan mester basha e cas abao, y m’a puntra, nos wela ta bay haya otro cas? Nan a bisa mi cu no, gobierno ta bay huur un cas pa mi wela,” el a sigura.

Y asina e proceso a bay. Nan a sali for di e cas y nan a manda e famia aki na un otro cas di huur te ora nan por haya e pago di e cas cu a basha abao pa e por cumpra un otro cas.

“Gobierno a bisa mi wela cu nan lo core cu tur e gasto di huur di e cas y e gasto ey no lo ta parti di e benta di mi wela su cas, pasobra a nan ta core cu e gasto ey di e lunanan cu nos mester a keda den e cas di huur te ora cu nan duna nos of provee nos e placa of e tereno cu mi wela tabata kier,” el a conta.

E persona aki ta expresa cu nan ta bin for di un famia humilde di piscadonan, cu su welo a traha su mesun cas cu su mannan y ora el a muri el a laga e cas na su casa pa no tin problema den futuro, si sa cu añanan despues su casa ta bibando momentonan di angustia.

A saca nan di e cas di un dia pa otro y a plama e cas. Ora cu a plama e cas nan a bay den un cas di huur, y awor ya ta cinco aña ta andando y su wela no a haya ni e placa pa su cas ni e placa pa paga e cas di huur, y pa e motibo aki awo nan tin un debe masha grandi mes,cu cada luna ta aumenta.

“Nan a priminti mi wela, pone mi wela bay wak cas; un adecua pa mi wela su edad, nan a aproba esey bisando cu esey ta bay bira e cas di mi wela, pero na final no a bira mi wela su cas. E famia di e doño di e cas a bin menasa full mi famia, el a bira full un problema, pasobra nan a saca e famia di su cas pa mi wela por a bay biba aden. Gobierno no a paga nada, pero e manera con a saca nos di e cas di un dia pa otro tabata un stress,” el a bisa.

E ta considera cu gobierno y instancianan concerni den e proyecto aki a maneha esaki di mal manera, “pasobra con bo ta bay saca un hende bieu di su mesun cas, bo no a pag’e… y awor nan ta torturando mi wela pasobra e otro cas cu awor e ta hinca den dje tin dos aña cu no a ser paga. Nos a contribui y yuda Aruba haya su caminda, pero awor mi famia ta esun cu ta sali perhudica den tur situacion y tur angulo, tanto financieramente como emocionalmente, pasobra e cas tabata di un antiguo generacion, pasobra mi mama y tur mi tantanan a lanta su yiunan eynan, e ta un cas di famia.”

Pa loke ta trata su wela su salud, e ta informa cu poco a poco e situacion aki ta deteriorando su emocionnan. “E ta want’e, pero mi ta wak cu e ta bahando peso, e no ta come, e ta preocupa masha hopi mes, pasobra tin dia e ta sinti cu nos no por paga awa cu coriente. E ta sinti hopi descuida y e no ta sinti su mes sigur den situacion aki unda su unico pilar tabata mi welo y e no t’ey mas.”

Nan a busca ayudo huridico y esey ta den proceso, pero nan no sa ki a pasa cu e placa cu mester a paga na su wela pa e cas. Nan no ta compronde cu nan tin casi 10 aña den un situacion di un cas di huur, mientras cu su wela tin derecho riba su cen.

Pa e cas unda nan ta bibando awor, gobierno supuestamente mester a para responsabel pa paga pa esaki y nan ta bibando den dje sin cu gobierno ta paga nada pa esaki, manera el a declara.

E doñonan di e cas aki ta bezig cu corte y esey ta un otro preocupacion cu e famia tin na e momentonan aki, debi cu nan no sa na ki momento e doñonan di e cas por pidi nan pa sali for di e luga debi na incumplimento di pago.

“Tur esaki ta un situacion cu niun hende sa, pasobra tin hende cu no kier pa bira publico kico ta tumando luga aki, e inhusticia cu nan ta haciendo cu mi wela,” el a comenta.

E ta sinti su mes hopi desapunta debi cu e no sa con pa yuda su wela pa sali for di e situacion dificil aki, na unda e mes ta sigura cu e “ta sinta den un batata cayente” pa wak con e por yuda su ser stima cu cada dia ta sinti mas tristo.

Pa finalisa, el a trece dilanti cu su famia ta hende humilde, nan no ta hende di cen, cu ta gusta di lama y bay pisca, cu unico cos cu nan ta pidi ta pa saca nan di e momento tan duro cu nan ta bibando awor prome cu su wela cera su wowonan pa semper.