Gobierno di Aruba a tuma nota di e caida di Gabinete Rutte IV. Prome Minister Evelyn Wever-Croes despues di a wordo informa di e noticia aki, a tuma contacto cu su homologo Premier Rutte pa principalmente desea e y Hulanda forsa.
Prome Minister tabata den contacto cu Secretario di Estado, Alexandra van Huffelen, na unda cu señora Van Huffelen a informa Prome Minister di caida di Gabinete Rutte IV y nan ta un gobierno demisionario awo. Secretario di Estado Van Huffelen a expresa cu e lo sigui traha pa sigui yuda Aruba. Den nomber di Gobierno di Aruba, Prome Minister a desea Secretario di Estado Van Huffelen hopi forsa y exito.
Desacuerdonan den e partidonan di coalicion a duna luga na caida di e gobierno Hulandes. E tema cu a tene e partidonan den coalicion dividi ta e tema di asilo, cu ta un tema hopi dificil y delicado. Esaki, Prome Minister a indica, ta un reto conoci tambe aki na Aruba.
Den un comunicado di prensa, Prome Minister a enfatisa cu a pesar di e desaroyonan di gobierno y politica na Hulanda, pa cu Aruba, nada lo cambia por lo pronto. E siman cu a pasa, Gobierno a reuni cu Secretario di Estado van Huffelen durante su bishita cortico na Aruba y lo sigui na mesa pa negocia e refinanciamento di e debe di Covid.
“Gobierno lo sigui e desaroyonan na Hulanda di cerca. Mi ta desea e gobierno demisionario forsa pa atende e retonan di gobernacion y cu e campaña electoral”, Prome Minister Evelyn Wever-Croes a expresa.
