‘Ironia di bida’ nos por yama e hecho cu awor e actual gabinete, y principalmente e partido mayoritario den e coalicion, ta prefera mantene e actual ley di supervision financiero, producto di e contrincante eterno, acorda cu Hulanda na 2015, na lugar di acepta e proposicion Hulandes pa pasa e supervision aki pa un ley di Reino. Nos ta corda ainda e tumulto y desorden cu a tuma lugar na parlamento, unda hasta tiro a cay. E parlamentarionan di e partido democrata cristian a haya nan obliga di guli e berguenza aki, pasobra Hulanda no a laga lugar pa wega: tabata acepta e ley aki o e ley di supervision lo a yega di tur manera via un Algemene Maatregel van Rijksbestuur (AMVR), loke pa e partido den gobierno lo tabata un berguenza mas grandi ainda.

Desde 2015 te awe regularmente por tende critica riba e partido rival cu en berdad a causa e supervision imponi pa Hulanda, cu nan maneho financiero totalmente iresponsable, cu den e aña anterior a conduci caba na un medida di gobierno di Reino, cu a desemboca den e huelga di hamber di e ministro presidente di e tempo ey. E critica no a keda na palabra so, pasobra den e protocol firma cu Hulanda pa e gobierno di coalicion cu a tuma rienda di e pais na 2017, tabatin compromiso pa adapta e ley di supervision Arubano. Durante e tratamento di e cambionan aki, e partido mayoritario den e coalicion a haci un intento pa cambia e ley na nan manera, a traves di ‘delete’ gobierno di Reino, cu su responsabilidad pa supervisa y sanciona, for di e ley. A pasa e cambionan tambe, y por a presencia un momento di alegria no fingi hunto cu e representantenan mas halto di gobierno den parlamento. E alegria tabata di corto duracion pasobra aparentemente nos gobernantenan a lubida cu representante di Rey, nos Gobernador, mester firma pa e ley bin na vigor, loke nunca a sucede, riba orden di gobierno Hulandes. A yega na un entendimento entre gobierno di Aruba y di Hulanda pa mantene e ley di Aruba hunto cu e protocol como base pa e supervision cu a keda manteni, te awe. E cambio di ley a bay pa bari di sushi.

Pero, mientras tanto bida ta sigui y ta dal su buelta, tin vez straño. Awor Aruba tin un debe grandi cu Hulanda di cual mester regla con e pago ta bay sucede. Y Hulanda ta insisti cu nan no kier continua mas cu e supervision den e ley di Aruba, pero ta desea pa e ley bolbe na su cuna, cu ta e ley di Reino di supervision, cu ta existi desde 2010 pa e otro dos islanan autonomo. Desde 2015 te awe nos no ta mira ningun politico ni medio di comunicacion referi na e hecho aki, cu e contenido di e ley di Aruba a bin directamente for di e ley di Reino pa e dos otro islanan, pasobra manera bisa caba, lo a haya e ley di supervision aki no via consenso, sino via imposicion. No ta ningun hurista genio na Aruba a formula e ley local aki.

E pregunta ta awor naturalmente pakico ambos banda ta para firme pa nan posicion den e asunto aki. Di banda di Hulanda, y nan no ta bisa esey ‘en voz alta’, e punto ta cu nan no kier core e riesgo atrobe cu e asunto ta keda pega den parlamento di Aruba. E chasco cu gobierno a organiza e tempo ey pa elimina e supervision pa nan lo ta un ‘one time thing, never again’. Pa gobierno di Aruba e oposicion contra un ley di Reino ta asina importante, aparentemente, cu nan ta dispuesto pa guli nan orguyo y acepta e ley, cu a origina den seno di nan rival eterno y cu tanto nan a critica y a purba cambia na nan antoho, como un mihor alternativa. E siguiente pregunta cu ta surgi ta: pakico ta antoha tanto defende ley cu a nace den seno di e rival eterno, y no ta acepta e ley di Reino cu tin practicamente e mesun contenido? Ta imposible pa kere, manera por lo menos un parlamentario a expresa, cu nan ta prefera pa parlamento di Aruba tin algo di bisa den e supervision. Esaki ta nonsense pasobra e ley ta describi e proceso di supervision, unda responsabilidad y derecho di gobierno di Reino y e papel di e colegio di supervision CAft ta bin dilanti. Parlamento di Aruba ta keda trata y aproba presupuesto, y cambio di presupuesto, pero di antemano y despues e supervision ta haci su trabao. Y si cos no ta bay na agrado di gobierno Hulandes ( y di Reino), nos ta haya e proceso di coreccion manera el a caba di tuma lugar aña pasa, unda gobierno di Aruba a evita un intervencion bahando e deficit proyecta cu alrededor di cien miyon florin. Y, manera bisa caba, no mester hinca den nan cabez mes pa purba cambia algo, ademas cu Hulanda, manera a sucede caba algun aña pasa, lo no tarda pa mustra ken ta manda den Reino.

Loke gobierno di Aruba ta laga nos sa awor ta cu nan ta dispuesto pa nos bay paga hopi mas na interes riba e debe publico grandi, envez di acepta cu e mesun supervision desde 2015 lo continua den un ley di Reino. Pa nan ta facil pa papia asina, ta nos, e comunidad, lo mester pone e placa ey…