Sospechosonan di caso di Vacuna Gate ta culpabel y ta castiga cu oranan di trabao comunitario

Dia 6 di juli ultimo, corte di Prome Instancia a duna su sentencia tocante caso Anglo of asina yama “Vacuna gate” na unda e sospechosonan tabata acusa di a participa na un organisacion criminal y a comete hechonan castigabel como haci registronan falso durante campaña di vacuna y di a haya pago pa haci esaki.

Den esaki, a bira conoci cu e sospechosonan di inicialnan G.G.G.O., M.G.J.M. y J.R.R. den e asina yama caso Anglo a haya un castigo diferente di loke fiscal a pidi, kiermen cu nan ta culpabel di e actonan castigabel cu nan a comete pero nan no mester bay KIA sino cu nan a haya oranan di trabao comunitario.

E ex-contratistanan aki di departamento di salubridad (DVG) tabata acusa di a haci registronan falso durante e campaña di vacuna y di a haya pago pa haci esaki.

Investigacion a mustra cu a registra sigur 60 vacuna na orarionan cu e post di vacuna tabata cera ainda.

Tambe a haci un cantidad di registro desde cas di un di e sospechosonan. Diferente persona cu ta aparece riba e lista di registronan a ser scucha como sospechoso y nan a declara cu nan a paga pa un prueba di vacuna. E sospechosonan mes ta bisa cu ta trata di 5 pa 11 registro.

Ministerio Publico tabata acusa e sospechosonan di a participa na un organisacion criminal cu a comete hechonan castigabel, esta, registra pruebanan falso di vacuna. Ademas nan tambe tabata acusa di corupcion como ambtenaar y un di e sospechosonan ta alabes tabata acusa di posesion di cocaina.

E sospechosonan aki a desacredita Pais Aruba cu nan actonan. Den un epoca di medidanan y restriccionnan nan a haci maluso di nan posicion puramente pa ganashi financiero. E confianza cu hende por tin den e campaña di vacuna y e status cu un prueba di vacuna Arubiano tin, a bay na discusion, door di nan manera di actua. Den un pais manera Aruba cu ta depende di turismo, esey ta algo sumamente dañino, na opinion di Ministerio Publico.

Pa e motibonan aki fiscal tabata exigi durante e tratamento castigonan di prison di 18 luna contra e sospechosonan O. y M., di cual 12 luna tabata condicional. Contra e sospechoso R. fiscal a exigi un castigo di prison di 22 luna, di cual 18 ta condicional.

Fiscal a exigi contra tur tres sospechoso castigo di trabao pa comunidad di 240 ora y un multa di 2.500 florin cu na final, esey ta lo cual e mayoria a haya como castigo.

Tambe a pidi Corte pa lanta e suspension di nan detencion preventivo, pa asina e sospechosonan lo por wordo traslada mes ora pa KIA pa sinta nan castigo di prison, si en caso Huez haya nan culpable. Sinembargo, awo ta conoci cu e sentencia ta nifica cu e condenadonan no mester bay sinta castigo den KIA.