Directie Natuur en Milieu (DNM) ta desea den e siguiente simannan enfoca riba e importancia di yerbanan di lama. Nos leynan local ta proteha 5 sorto di yerba di lama, cual ta esunnan cu nos lo publica tur siman un sorto ariba nos paginanan social.
Tambe tin un sorto di yerba di lama cu ta invasivo, esaki tambe nos lo informa di dje durante e mesun periodo. Asina por reconoce e diferencianan cu ta existi. Nos a menciona e palabra Prado den e titulo di e relato aki, tambe di esaki nos lo elabora riba dje. Pasobra tin ora nos no tin palabranan na Papiamento pa describi cierto terminologia y p’esey ta uza esunnan di Papiamentu, Spaño, Ingles of hasta na Hulandes.
Cu ‘pradonan’ nos ta referi na veldnan di yerba di lama. Yerba di lama ta un di e ecosistemanan mas importante na mundo y sigur pa Aruba su bida marino tambe. E ecosistema aki ta duna un cantidad di beneficio na humanidad y bida salvahe marino y terestre en general. DNM ta desea elabora extensamente riba e servicionan cu e yerba di lama ta brinda como tambe e desbentaha si nos perde e pradonan di yerba di lama. E pradonan bao lama ta consisti di matanan cu ta floria y crece den lama seco (cu no ta hundo). E yerba di lama ta cuminda y luga di sconde pa un cantidad di bestia marino. Prado di yerba di lama ta yuda filtra awa, reduci erosion y tambe ta wanta carbon (store carbon).
Aki na Aruba nos conoce 5 sorto di yerba di lama cu ta aparece den nos ley local, landsbesluit bescherming inheemse flora en fauna (LB 2017 n.48): Halodule wrightii, Halophila baillonis, Halophila decipiens, Halophila engelmanni y Thalassia testudinum (yerba di Caña). Den e edicionnan di conoce nos matanan riba DNM su plataforma social nos lo elabora riba e sortonan aki y ilustra un potret cu descripcion. Nos mester menciona cu tambe nos ta haya e sorto exotico invasivo cu ta yama, Halophila stipulacea, cu ta invadiendo Caribe incluyendo Aruba. Nos lo trece informacion di e sorto aki tambe cu tawata bao di investigacion den pasado den e estudio cientifico local realisa na november 2021, pa cientificonan di Universidad di Wageningen (WUR).
Importancia di pradonan di lama, ta inclui:
Cuminda y habitat (cas) pa bida marino: pradonan di yerba di lama ta vital como fuente di cuminda pa hopi sorto di animal marino, manera pisca, turtuga, calco y cangreu. E lugar aki ta lugar pa e bestianan sconde y/of pone webo;
Ta yuda cu e filtracion.; E prado di yerba di lama ta yuda filtra e awa, eliminando nutrientenan y contaminacion. Prado di yerba di lama ta yuda drecha calidad di awa di lama haciendo esaki adecua pa bida marino of pa hende por disfruta;
Controla erosion. Pradonan di yerba di lama ta yuda reduci erosion y ta stabilisa e sedimento cu tin na suela di e lama y oceano. Esaki ta proteha e areanan clasifica como costa (coastlines) contra tormentanan of otro desaster natural;
Carbon storage. Pradonan di yerba di lama ta wanta carbondioxide, cu ta yuda mitiga cambio di clima.
Menasanan pa e pradonan di yerba di lama ta inclui:
Destruccion door di desaroyo den cercania di costanan. Ta destrui pradonan di yerba di lama pa asina construccion tuma luga manera, dredging, raspamento di e suelo di lama, yenamento di beachnan cu santo cu no ta orignal di e luga ey mes.
Polucion. Pradonan di yerba di lama ta contamina pa motibo di run-off di awa procesa di awa grijs, desperdicio industrial of di agricultura.
Piscamento di mas of na escala grandi (Overfishing). Pradonan di yerba di lama ta duna cuminda y ta cas pa cantidad di pisca y otro sortonan marino. Ora cu populacion di pisca caba/ baha pavia di piscamento dimas di e piscanan cu ta come yerba di lama, e yerbanan di lama por crece fey control, esaki por causa caida di e biodiversidad y e condicion di e pradonan di yerba di lama ta bay atras door di imbalanse. Ora botonan lastra redanan na fondo di lama, esaki ta haci cu sedimento ta bira los, cual ta haci e suelo degrada mas lihe door cu tin olanan y coriente di lama, cu ta causa mas daño na e pradonan di yerba di lama.
Cambio di Clima. Esaki ta causa cu e nivel di lama ta subi, asina e ta causa cu ta inunda pradonan di yerba di lama y ta causa cu esakinan ta bira mas vulnerabel pa dañonan causa pa tormentanan.
Kico abo por haci pa yuda?
Reduci bo impacto riba e medio ambiente causa pa uzo di pesticida y/of fertilisantenan.
Deshaci di awa contamina na un manera responsabel, cu e no ta causa daño na e awa terenal cu ta yega den nos lama y despues ta afecta e pradonan di yerba di lama.
Aporta of sostene practicanan di piscamento cu ta sostenibel. No uza taraynan wowo chikito cu ta caba cu pisca chikito. Lastramento di taraynan den fondo di lama y raspa esaki tambe ta causa daño na e pradonan di yerba di lama.
Siña di e pradonan di yerba di lama y e menasanan cu tin pa esakinan y comparti cu otro pa expande e conocemento di e topico.
Directie Natuur en Milieu (DNM) ta desea comparti informacion di e yerbanan di lama cu comunidad pa asina nos ta mihor informa pa por tin discusionnan un cu otro tocante e necesidad pa proteha e pradonan di yerba di lama. Ta hunto, nos por yuda proteha e ecosistema importante aki pa sigura cu ta keda duna su servicionan y beneficio na hende y tambe bida salvahe marino pa hopi generacionnan cu ta sigui.
