Ayera, agente policial R. Vos di 51 aña di edad a presenta dilanti hues pa trata su caso pro forma. Mientras cu Vos ta deteni na KIA, e ta acusa cu tres cargo. Fiscal a splica cu e investigacion no ta cla, sino cu por dura al menos tres luna mas, y cu mester laga Vos deteni pa evita cu e por stroba e investigacion.
Pendiente a keda pa pone un fecha definitivo pa trata e caso integralmente, segun un relato di portal online, NoticiaCla.
Anteriormente, Bon Dia Aruba a reporta cu Vos tabata deteni pa mas di 80 dia sin cu a revela publicamente di kico e tabata acusa. Awo a bin mas informacion riba e cargonan.
Vos a keda deteni dia 22 di maart ultimo, y el a bay cera na KIA inmediatamente. Durante e tratamento di e caso ayera, a bira conoci cu e cargonan den su contra ta malversacion di placa y portafoon, cooperacion den soborno y labamento di placa, segun NoticiaCla a informa. Segun fiscal, ainda falta mas investigacion tecnico, y dependiendo di e resultado di esaki lo mester scucha mas persona involucra den e caso. E caso ta compleho y tin hopi aparato y hende involucra, incluyendo periodista cu a ricibi informacion via operacion di Vos.
Abogado di Vos a pidi hues pa suspende e detencion preventivo, mirando e situacion personal di famia di Vos – e tabata e unico cu tabata provee pa su famia y awo su salario a stop y no tin entrada. E tin dos yiu cu tin problema psicologico.
Sinembargo, fiscal a rechasa e solicitud despues cu fiscal a splica cu door cu mester scucha mas hende, si Vos sali, e hendenan en cuestion no ta bay papia mas.
Ta bay bolbe trata e caso pro forma dia 21 di september pa 2pm.
