Otmar Oduber: “Mi ta bay saca tur nomber y e bagamunderia cu Ministerio Publico aki ta haciendo, ta basta”

Ayera mainta den un conferencia di prensa, e ex-mandatario a trece dilanti un update di loke ta trata e caso Flamingo y ademas el a sigura cu e ta bay back den politica confirmando su participacion como candidato den un proximo eleccion.

E caso Flamingo a cuminsa na 2019 ora autoridadnan a drenta den Oduber su cas, na cas di su mayornan y na otro luga. Ademas el a bay cera 23 dia den conexion cu e mesun caso aki unda el a conta cu na december e investigacion a termina y na februari ultimo e rapport a keda cla.

Cinco luna despues, segun el a conta, su abogado a haya un carta di Ministerio Publico notificando cu a tuma e decision di dagvaard su persona pa loke ta trata e caso Flamingo.

Na 2020 ora nan a drenta su cas Ministerio Publico a informa Oduber cu a cuminsa un investigacion na unda a haci varios entrada hudicial tocante e posibel delito di corupcion y otro hechonan castigabel relaciona cu otorgamento di terenonan comercial den periodo di 2007 te cu 2019.

“Ni un di e puntonan aki ta kom voor den un supuesto dagvaard y ayera (diaranson) nan a bisa mi abogado cu nan a tuma e decision cu nan ta bay dagvaard mi cu un caso cu ta yama Flamingo,” el a sigura.

Den e e-mail, Oduber a sigura cu no tin ni un caminda unda ta bisa cu esaki ta trata di corupcion, no tin ni un acusacion di Cuerpo Policial, tampoco tin nada tocante terenonan erfpacht unda el a sigura cu di tur e acusacion cu cual a cuminsa e Flamingo a cay na awa.

Loke Ministerio Publico a señala na comienso di investigacion, nada di esey ta bay tuma luga den un posibel dagvaard y den e-mail tambe nan a sigura cu nan a priminti cu di e ultimo caso cu Oduber tabatin, nan lo duna e decision di nan parti prome cu reces.

“Mi abogado ta bay hiba mi defensa den corte pero Otmar Enrique Oduber ta bay hib’e den pueblo. Den publico, sin filter, cu nomber y fam di tur polis, di tur Landsrecherche, RST, y Ministerio Publico. Tur nomber mi ta bay menciona pasobra esey ta loke nan a haci cu un cantidad di hende, no den mi caso so. Comerciantenan drechi na Aruba, a djis tira nan den un caso pa despues dilanti porta di corte nan ta bisa nan, nos no tin nada contra bo, bo ta keda liber, dal bay.”

Ministerio Publico a indica den e e-mail cu nan ta bay puntra hues ki fecha tin disponibel pa trata esaki. Oduber a informa cu nan a pidi varios biaha un “kennisgeving niet verder vervolging” pa asina ey e por cana su caminda y pone tur esnan responsabel pa daña su nomber, pa pidi pa daño y perhuicio y esey te e unico peticion cu nan a haci.

E motibonan pakico nan ta bay dagvaard Oduber manera el a sigura, cu no ta e mesun motibonan cu a acusa su persona anteriormente, ta segun Ministerio Publico, complice di entrega di dos tereno di cas “afwijking van het beleidsterreinen toe te kennen” na unda Oduber a afirma cu ta un maneho cu te dia di awe DIP ta ehecuta y cu ta su persona a crea esey, cu a base di e maneho aki cu segun Ministerio Publico a indica, Oduber a coopera cu dos hende por haya tereno di cas via un peticion for di aña 2013 y 2014 ora su persona no tabata minister ainda.

“Ni un acusacion riba mi, ni un placa envolvi, unico cos cu nan ta bisa ta cu m’a desvia di mi beleid, un beleid cu ora m’a sali for di KIA m’a ripara cu esaki ta un di e cosnan cu nan kier bin riba dje. M’a haya firma di tur e top di DIP, DOW, entre otro, ken ta declara cu esey tabata e beleid di minister.”

E di dos acusacion ta “zaakdossier spookambtenaar,” unda Oduber a sigura cu Marisol Lopez-Tromp no tin nada di haber cu e caso Flamingo. El a entrega un keho dos luna despues cu a haci entrada hudicial na Oduber su cas ora Lopez-Tromp a baha como minister.

“Marisol a bin cu cinco acusacion cu tabatin hendenan den prensa cu tabata den mi payroll, cu lo tin hendenan cu ta haci social media y mi tabata paga nan. Nan a laga cuatro acusacion cay pasobra m’a hiba tur e pruebanan ora m’a bay entrega e keho pa mustra cu e persona cu e ta bisa cu m’a duna un contract prome cu m’a baha como minister, tabatin dos aña ta traha caba cu gobierno, no cu mi so, sino cu mas minister,” el a sigura.

E di tres acusacion pa e dagvaard ta e zaakdossier ‘Esser,’ na unda Ministerio Publico ta indica cu el a comete “medeplegen misbruik van functie” ora el a duna algun hende trabou: un na DOW, cinco na DIP y cuatro na Serlimar, y cu nan a haya cu e hendenan aki ta registra den partido POR y nan lo por vota apoyando Oduber den su carera politico si e lo subi riba lista.

Oduber ta afirma cu esaki no ta bay caba den un daño y perhuicio solamente sino tambe e ta bay contra tur instancianan como Landsrecherche, RST, y miembronan di Cuerpo Policial cu a traha rapport falso pa cuminsa un investigacion di cuatro aña cu a afecta su persona.

“Mi ta bay saca tur nomber, sacando e porkeria, e bagamunderia aki cu Ministerio Publico aki ta haciendo—ta basta.”

Oduber tambe a declara cu e ta di acuerdo pa comparti cu comunidad y cu prensa tur e dossier di su caso cu tur e acusacionnan cu tin den dje pa motibo cu “loke Ministerio Publico ta haciendo cu hendenan drechi no ta normal. No ta normal cu un comerciante cu a traha 30 aña di su bida, cu ta exitoso, ta ser lastra pasobra el a cumpra un rifa of un bingo di un politico.”

“Mi ta bay back den politica”
Igualmente el a sigura cu den proximo eleccion e ta bay ta un candidato riba lista: “e pais aki mester haya hende pa para na un forma recto, corecto y move e pais aki.” Sinembargo, e ta afirma cu si e tin un caso penal of si e ta ser haya culpabel, e no ta continua pa sigui bay den politica pa motibo cu tin cu respeta e funcion di ta un politico cu no por ta condena ora ta sinta den un stoel, pero si ta evalua politica, e ta confirma cu e ta bin back.