Durante conferencia di prensa ayera mainta, Minister di Salud Publico y Turismo, Dangui Oduber a indica cu Gobierno di Aruba ta bay percura pa back cu e ‘visibility team’ cu den pasado tabata encarga cu e siguridad den e area di hotelnan.

Durante e oportunidad pa realisa pregunta, un miembro di prensa a puntra Minister Oduber tocante e proyecto di visbility team. E minister a splica cu den pasado Aruba tabata conoce visibility team cu tabata percura pa cuida y mantene e area di hotelnan sigur, pero gobierno anterior a elimina esaki.

El a enfatisa cu aworaki mescos cu e gobierno a percura pa instala mas di 250 camara di siguridad, gobierno ta bay percura pa bin back cu e visibility team. El a sigui splica cu Aruba Tourism Authority (ATA) ta financia Aruba Hospitality & Security Foundation y aworaki nan ta den e proceso pa institui e team aki back sobre todo den e area di high rise y low rise hotel pa asina percura pa tin oficialnan di polis visibel den henter e area aki.

“Nos ta considera e proyecto di camara na unda cu ya tin camara di seguridad instala den e area di high rise sumamente positivo y agregando e visibility team back sigur lo duna mas garantia na nos turistanan cu Aruba keto bay ta wordo considera y ta e pais mas sigur den henter e region di Caribe,” el a resalta.

El a agrega cu e intencion ta pa cubri prome e area di Palm Beach y tambe low rise hotel y despues lo evalua si tin fondonan disponibel pa por amplia visibility team aki.

Den luna di januari ATA conhuntamente cu Aruba Hospitality and Security Foundation a anuncia cu nan a firma un acuerdo pa enfoca riba reintroduccion di un plataforma cu lo carga e nomber Tourism Security Patrol (TSP).

Durante e anuncio aki, Ronella Croes, CEO di ATA, a referi na e visibility team cu ta existi for di añanan pasa y cu a brinda su fruto pa e industria turistico. Un di e metanan ta pa reintroduci un tipo di visibility team y esaki a bin ta traha riba dje.

E acuerdo cu a ser firma na januari tin un duracion di tres aña y ta enfoca riba reintroduccion di un plataforma cu lo carga e nomber Tourism Security Patrol (TSP), cual tin e intencion pa brinda asistencia na KPA, vigila e siguridad den diferente zona turistico enfocando den e playanan cu lo cuminsa acapara e zona for di Divi Tamarijn te cu Hotel Ritz Carlton y lo amplia esey pa asina den dado momento cubri e area for di Bushiri te cu Arashi