Hues den Prome Instancia a trata riba diabierna e caso penal contra dos sospechoso cu ta wordo acusa di intento di homicidio. E sospechosonan ta e rumannan T.E.A.B. (24) y C-A.M-G.E.B. (22).
Ta acusa nan di a dal y scop un turista Canades tanto cu el a sufri lesion fisico hopi grave y cu hasta e lo por a fayece. E incidente violento aki a tuma luga riba e parkinglot na cruiseterminal di Oranjestad.
E dos sospechosonan a admiti loke nan a haci y ta wordo considera totalmente responsabel pa nan accionnan. Nan a bisa di no por corda mucho di e sucedido, esaki probablemente debi na nan uso di alcohol y droga.
Fiscal di husticia a exigi contra e sospechoso T.B. un castigo di prison di siete aña. Ministerio Publico a exigi contra e sospechoso C-A.B. tambe un castigo incondicional di siete aña. E tempo cu nan a sinta den detencion preventivo lo wordo kita di e total.
Fiscal a enfatisa den su requisitorio cu e caso horibel aki a haci hopi daño na e victima y su famia. Pa hopi tempo nan lo sufri e consecuencianan traumatico di e dia ey. A haci daño tambe na Aruba y particularmente na e imagen di nos pais como destinacion di vakantie safe. Niun hende aki na Aruba lo desea pa turistanan wordo confronta cu un explosion di violencia manera e sospechosonan a causa. Turistanan mester sinti nan mes sigur y proteha tur caminda na Aruba y na cualkier momento durante dia of anochi.
Hues lo dicta sentencia riba 7 di juli 2023.
