(CiberCuba) – E medidanan cu ta busca facilita e fluhonan migratorio di e Cubanonan, anuncia den luna di mei pa e Gobierno di Cuba, a drenta na vigor dia 1 di juli.

“Dia 1 di juli ta drenta na vigor e medidanan migratorio y consular nobo anuncia recientemente pa e MINREX (Ministerio di Relacionnan Exterior),” e medio oficialista Agencia Cubana de Noticias a señala riba su rednan social. Entre e disposicionnan migratorio nobo aproba pa e autoridadnan Cubano tin e extension di e validez di e paspoort na 10 aña pa personanan di16 aña bay ariba y cinco aña pa menornan di e edad ey.

Desde 1 di juli esunnan cu adkiri un paspoort nobo Cubano ta bay tin e fechanan aki di vencemento, y ademas, no ta necesario prolonga cada dos aña, manera antes, ya cu ta elimina e rekisito di prolongacion.

Tampoco ta necesario pa prolonga e paspoortnan Cubano emiti prome cu e aprobacion di e medidanan nobo. “E prolongacion no ta necesario pa ningun paspoort, ni pa esun cu tin validez di seis aña ni pa esun di 10 aña,” Ernesto Soberon, director general di Asuntonan Consular y Cubanonan Reisdente den Exterior, a aclara den luna di mei.

“E validez di e paspoort di 10 aña ta bay ta pa esunnan cu wordo emiti despues di 1 di juli. E paspoortnan vigente no tin necesidad di realisa un prolongacion,” MINREX a specifica.

Ademas, ta keda vigente e prolongacion di estadia den exterior, mas leu cu 24 luna, automatico y sin costo, anuncia na maart di 2020, cu obhetivo di apoya e Cubanonan cu tabata den exterior durante e periodo critico di COVID-19.

Otro di e medidanan cu a drenta na vigor ta esun di e tarifanan nobo pa emision di paspoort na consuladonan Cubano. Desde 1 di juli, e Cubanonan riba 16 aña ta paga na e consuladonan 180 dollar of euro pa nan paspoort. Menornan di 16 aña aña ta paga 140 dollar of euro.

E medida no ta afecta e costo di e documento aki na paisnan Europeo, unda e Cubanonan ya tabata paga alrededor di 180 euro pa nan paspoort.

Sinembargo, e ta un reduccion substancial pa e Cubanonan na Merca, cu tabata paga 350 dollar pa nan solicitud. E prijsnan aki no ta inclui e impuesto pa gestion no personal y stempel pa post.

Pa Cubanonan residente na e isla ta mantene e tarifa di 2.500 pesos cu tabata cobra anteriormente pa e tramite aki. Otro di e medidanan cu a drenta na vigor ta esun di iguala e tempo di estadia na Cuba di Cubanonan residente den exterior y nan familiarnan stranhero.

Cu e disposicion aki, e pareha y yiunan di ciudadanonan Cubano residente den exterior, cu solamente por tabata te cu seis luna na e pais, por keda hasta un aña sin problema. Por ultimo, e autoridadnan migratorio Cubano a recorda cu desde 1 di juli, e migrantenan cu a bandona e pais prome cu januari 1971, mester haci uso di e paspoort Cubano na momento di ingresa Cuba, segun e constitucion nobo.