Tabata riba dia 30 di november di aña pasa cu e caso lamentabel aki a tuma luga na unda e hoben Eddy Rincon Bravo di 19 aña di edad naci na Colombia a perde su bida tragicamente.
Dia 30 di november anochi polis a ricibi un melding di algun ciudadano den e bisindario di tanki di Savaneta cu a scucha un tiro. Tabata trata di e hoben Rincon Bravo cu a wordo herida pa un tiro di un arma di candela.
Na momento cu polis a yega Rincon Bravo ainda tabata na bida y a logra conta polis loke a pasa. Tabata trata di tres persona den un auto color blanco, marca Mark X, cu a hinc’e den e auto y a tir’e. E victima a bula for di e auto pa purba scapa su bida y e auto a core bay.
No hopi tempo despues Cuerpo Policial a logra captura e sospechoso, Shannon Williams, den e bario di Mabon y hib’e cera mesora. .
A pesar cu ambulance a yega na e sitio pa stabilisa y a traslada e victima cu maximo urgencia pa hospital pa ricibi tratamento, Eddy Rincon Bravo a fayece e anochi ey pa motibo di e herida di bala.
Durante e tratamento di e caso, algun siman atras, fiscal di Ministerio Publico a pidi un castigo di 19 aña pa Williams. Ayera hues di Corte di Prome Instancia a duna su veredicto y a haya Shannon Williams culpabel di e asesinato di Eddy Rincon Bravo y a condena Williams na 17 aña di prizon.
Pa loke ta e otro hoben cu tabata den e auto na momento cu Williams a tira Rincon Bravo, Ka Min Li, hues a dicta un sentencia di 15 luna di prizon di cual tres luna ta condicional.
