Y ta sigui construi solamente den areanan caminda permisonan di construccion a ser declara irevocabel

Ayera, Three Rivers Real Estate, desaroyador di Secrets Baby Beach Hotel a emiti un comunicado di prensa den cual “ta desea di duna un aclaracion amplio pa loke a ser publica den un comunicado di prensa reciente relaciona cu e decision di corte pa mantene e suspension di permiso di construccion pa un parti specifico di e proyecto di Secrets Hotel.”

Manera Bon Dia Aruba a reporta e siman aki, Three Rivers Real Estate a ricibi un permiso di construccion pa e hotel na Sero Colorado y ciudadanonan, entre otro, habitante W. Werkema, a entrega un obhecion (bezwaar). Basa riba articulo 59 di e bouw en woningverordening, e permiso di construccion ta keda automaticamente suspendi na momento cu e habitantenan a entrega nan bezwaar.

Den su comunicado di prensa, Three Rivers Real Estate ta indica cu nan “ta respeta completamente e decision di corte recientemente relaciona cu un disputa cu un permiso di construccion na un area specifico di e proyecto di e hotel. Mientras cu e sentencia aki ta limita e actividadnan di construccion den e area concerni te ora cu un sentencia di corte wordo emiti, e no tin influencia riba e continuidad di e resto di e proyecto, unda cu e permiso legal ya a ser declara irevocable pa e corte y, consecuentemente, e construccion ya ta andando.”

 

E decision di corte, emiti pa corte di prome instancia, ta reconoce e necesidad pa sigui procesonan regulatorio y a dirigi su maneho pa no construi den e area den disputa te ora cu un decision wordo tuma pa corte relaciona cu e permiso di construccion cu ta wordo disputa pa algun habitantenan den e area.

 

“Mientras cu nos ta respeta e decision di corte relaciona cu e permiso di construccion pa e area den disputa, nos ta contento di por continua e construccionnan den e seccion di nos proyecto caminda permisonan legal a ser declara irevocabel. E trabaonan aki lo wordo realisa cumpliendo cu tur e reglanan y guia aplicabel di e instancianan concerni. Awor nos ta wardando e decision di e corte tocante e areanan den disputa,” asina Sr. Alejandro Murcia, director di Three Rivers Real Estate a declara.

 

Segun e comunicado, Three Rivers Real Estate ta keda comprometi pa un comunicacion transparente y mantene un Partnership solido cu pueblo di San Nicolas y henter comunidad di Aruba.

Riba e imagennan aki por mira e resultado final di e proyecto cu lo forma parti di Secrets Baby Beach Hotel.