(ElNuevoDia) – Centenares di ciudadano, representando e sectornan religioso, comercial, sindical y comunitario di e pais, a marcha ayera desde e Capitolio te cu La Fortaleza pa exigi pa no tin mas aumento den e recibo di coriente.
E manifestantenan di gruponan manera Centro Unido de Detallistas, Sierra Club y e Iglesia Metodista de Puerto Rico a rechasa tambe e plan di ahuste di debe di e Autoridad de Energia Electrica (AEE) cu ta contempla un aumento den e recibo di un 30% y cu lo por tin efecto perhudicial, segun opositornan.
E hues federal Laura Taylor Swain a suspende siman pasa e kalender di proceso pa evalua y confirma e plan di ahuste di AEE cu ta basta restructura alrededor di 12 mil miyon di dollar den obligacion di e corporacion publico.
E Junta di Supervision Fiscal (JSF) a notifica na e tribunal su intencion di coregi e plan y recorta e obligacionnan di e AEE den por lo menos un 75%.
“E intencion di coregi e plan ta un adelanto importante den e direccion corecto,” Eva Prados, di e Frente Ciudadano por la Auditoria de la Deuda, a expresa. “Precisamente, e ta responde na loke ta e reclamo principal di e grupo multisectorial, cu e plan di ahuste di debe no tabata sostenibel y cu e por wordo coregi.”
E manifestantenan a señala cu aumentonan adicional den e recibo di coriente ta bay tin consecuencia negativo pa e sectornan mas vulnerabel di e poblacion.
“Nos ta bay sigui vigila loke nan propone y loke wordo aproba mester responde e miho interesnan di e pueblo di Puerto Rico,” Prados a indica.
E gobernador Pedro Pierluisi a bisa cu e ta spera cu e proceso di e restructuracion di e debe di AEE no resulta den un aumento den e tarifa di servicio di coriente.
