Fondo ta trece e prome vacuna pa tuberculosis den un siglo un stap mas cerca

(Aol)—Dos fundacion grandi den filantropia di salud global ta uniendo pa funda e ultimo etapa di pruebanan pa kico por ta e prome vacuna contra tuberculosis (TB) den mas cu 100 aña. Fundacion Wellcome y di Bill & Melinda Gates ta bay inverti casi 550 miyon dollar pa e pruebanan Fase III di e vacuna M72.

TB, un malesa bacterial cu ta afecta mas tanto e pulmonnan, ta prevenibel y tratabel, pero 10 miyon hende ta contrat’e ainda tur aña, y 1.6 miyon hende a muri di TB na 2021, cu casi tur ta bin for di paisnan pober. Pa hopi tempo, e malesa aki tabata e di mas mortal den henter mundo, aunke esaki a ser supera pa Covid-19.

Na comienso di e aña aki, Bill Gates critica mundo pa e falta di fondo pa herment nobo pa TB. Su organisacion ta bay provee mayoria di financiamento pa e prueba nobo: casi 400 miyon dollar. Pero e organisacion tambe ta bay busca pa partner comercial pa suministra e vacuna di e prueba resulta como exitoso.

“Nos mester di un fabricante pa vacuna. Esey nos ta discutiendo awo. Nos tin un par partner cu ta interesa,” segun Trevor Mundel a conta Reuters, ken ta presidente di salud global na e Fundacion Gates.

E prueba lo bay tuma 4-6 aña entre 26.000 hende na mas cu 50 sitio den Africa y Zuid-Oost Asia. Ta bay test e vacuna pa wak con bon esaki ta preveni TB, cual por infecta te cu un kwart di hende den henter mundo. E prueba ta bay inclui personanan cu HIV tambe.

E vacuna existente, esta Bacille Calmette-Guérin (BCG), a ser suministra pa prome biaha na 1921. Esaki ta yuda proteha baby y mucha contra TB severo, pero despues di tempo e ta sali for di curpa y por solamente ofrece proteccion limita contra e forma comun di e malesa cu ta invadi pulmonnan di adolescente y adulto.

M72 a ser desaroya na comienso di e milenio aki pa NGO Aeras y GSK, cual ta continua di provee e pida di e vacuna cu ta boost e sistema immuun. Awo e organisacionnan aki ta lidera pa e Instituto di Investigacion Medico di Bill y Melinda Gates, y e vacuna a preveni TB di desaroya den mita di e hendenan cu a ricibi esaki den e pruebanan Fase II, segun data di 2018 ta mustra.

E eficacia ey di casi 50% ta abao pa loke ta vacuna, pero ainda por haci un diferencia: aki 25 aña, e por salba 8.5 miyon bida, segun e Organisacion di Salud Global a bisa.