Exprodesk ta bay duna tayernan na entrepreneur tocante ultimo tendencia den tecnologia

Departamento di Asuntonan Economico, Comercio y Industria (Deaci) y su unidad Exprodesk ta invitando tur entrepreneur y negoshinan local di Aruba pa participa den “Export Week 2023: Conquering New Horizonts”, cual ta bay dura un siman completo ofreciendo tayernan tocante e ultimo tendencia den tecnologia.

Den esaki, Sharon Meijer-van der Linden Policy Advisor Foreign Economic Relations and Business Advisor a señala cu esaki tambe ta pa duna hermentnan na e participantenan specialmente na e momentonan aki unda cu e tema mas papia den comunidad ta Inteligencia Artificial.

A base di esaki, Deaci y Exprodesk a prepara un siman for di 3 di juli te cu 7 di juli for di 9or te cu 12or di merdia caminda e personanan por scoge ki dia y ki ora ta desea di atende e tayernan cu no tin ni un costo, ta gratis.

E prome dia, 3 di juli nan ta habri e actividad cu Edjean Semeleer di Go Cultura Foundation papiando tocante “Craking the Cultural Goldmine & Doing Business with Colombia, na unda lo elabora riba industria creativo, con Colombia a desaroy’e y tambe con haci negoshi cu Colombia.

Dia 4 di juli e tayer ta bay ta den man di Jorge Zarraga di JZ Marketing cu “The AI Revolution, improving your time and effort more efficiently,” papiando mas tocante e proposito di e negoshi y con por usa AI pa mehora e productividad.

Pa otro dianan tambe lo tin temanan manera diseño di negoshi y a base di esey tin diferente hermentnan cu hendenan por usa, con economia virtual por asisti e negoshinan na unda tin posibilidad di un pilar economico manera economia virtual, ademas tambe lo duna informacion riba con por organisa eventonan digital cu sistema Cashless Payment System y la importancia di eCommerce pa exporta.

Ta p’esey cu Export Week ta dedica na tur entrepreneur cu tin un negoshi local cu e biaha aki ta bay enfoca den expansion di productonan y nan exportacion, ademas di industria creativo y cultural na unda hende ta pensa cu esey tin di haber cu artesanonan y musiconan pero e ta abarca hopi mas.

“E ta un siman pa tur negoshi cu kier haya sa mas tambe con AI por yuda bo den bo business model y p’esey nos ta invita tur na e expo aki,” Meijer-van der Linden a bisa.

Personanan interesa por registra na Exprodesk su pagina di Facebook unda por haya mas informacion di registro y mas informacion.