Ayera mainta den Parlamento di Aruba a tuma luga un encuentro publico na unda Minister di Labor, Energia y Integracion, Glenbert Croes a duna su declaracion tocante e politica di inmigracion. Den su introduccion Minister Croes a elabora ariba e cambionan esencial entre e manual di admision cu a drenta na vigor e aña aki y manual di admision cu tabata na vigor anteriormente.

E manual di admision ta rigi e politica migratorio, a pesar cu tin aspectonan di e politica migratorio cu ta cay bao Minister di Husticia. E manual di admision mas recien a drenta na vigor dia 1 di februari 2023 y a ser aproba den Conseho di Minister fin di december aña pasa.

Despues di aprobacion e siguiente parti importante ta implementacion di e maneho, cual Minister Croes a señala hopi biaha ta un poco mas dificil pasobra mester tin e cooperacion entre tur e ministerio- y departamentonan cu ta regarda e tema di admision sincronisa.

Durante e encuentro publico, Minister Croes a concentra ariba e diferencianan cu tin entre manual di admision nobo cu e manual di admision cu ya tabata existi. Henter e base di maneho ta basa riba e LTU y anteriormente e tabata LTUV.

Minister Croes a splica cu a tuma e decision pa bin cu un manual di admision nobo pasobra economia cu ta recuperando desde 2017 por mira e desaroyo economico cu ta impulsa door di turismo ta exigiendo hopi mas trahado cu tin disponibel riba mercado laboral local, pero tambe di hobennan cu ta graduando.

El a remarca cu desde 2017 na momento cu tabatin un cifra di desempleado halto, su ministerio a cuminsa traha inmediatamente riba con por incentiva personanan pa subi mercado laboral, “pone un presion positivo a traves di bo politica pa localnan haya oportunidad prome na trabao, pero mester tin e participacion den tur e procesonan aki di oportunidad di trabao,” e minister a indica.

Pa mantene e oportunidad habri pa localnan haya trabao prome cu stranhero, na 2017 a introduci politica di local counterpart, cual tabata existente caba, y e politica di local counterpart tabata permiti stranhero drenta mercado laboral, pero tabata exigi e dunadonan di trabao pa duna yiunan di tera e oportunidad pa ocupa posicionnan esencial habri.

“E ta e politica cu nos ta bin ta hibando desde 2017, cu excepcion di e pandemia cu a dal nos, tur cos tabata bayendo bon,” el a enfatisa.

Minister Croes a informa cu e cifra di desempleo prome cu pandemia tabata 5.2%. Esaki, segun e ta señala, tabata bayendo den rumbo pa sigui baha, locual ta nifica cu e politica di integracion riba mercado laboral tambe tabata efectivo pasobra e cifra di desempleo tabata sigui baha. Pero na momento cu pandemia a yega realidad a cambia pa un par di aña.

Pa loke ta e cifra di desempleo mas recien, Minister Croes a indica cu na 2022 e cifra tabata 6.6% y pa 2023 e indicacionnan ta cu e ta bay sigui baha.

El a subraya cu hopi biaha ta wordo bisa cu stranhero ta kita trabao di hendenan local, pero segun e minister esaki no ta e caso. “Si tin hopi stranhero tambe ta participa den e mercado laboral. Mi a papia cu director di SVB/AZV pa reafirma nan opinion ariba e impacto positivo di tin stranheronan cu ta participa legalmente den e mercado laboral. E impacto positivo pa e fondonan di AZV, SVB y con necesario e ta mirando e diferente factornan cu tin, entre otro di embehecimento y su impacto,” el a menciona.

Pa loke ta trata e esencia di e diferencianan entre e manual di admision 2023 y e manual cu tabata vigente cu a wordo implementa door di Minister di Husticia e tempo ey, Sr. Andin Bikker, Minister Croes a elabora ariba diferente punto.

El a splica cu ley tabata permiti pa saca permiso multianual, pero esaki no a wordo implementa. Desde aña pasa DIMAS ta dunando permiso multianual. Esaki ta conta pa diferente categoria, trahado, pensionado, reunificacion familiar, inversionista, matrimonio entre otro.

Esaki, el a enfatisa, ta un oportunidad positivo pasobra na momento cu un persona pidi un permiso multianual, esey kiermen cu e persona mester paga tur e gastonan di tur e permisonan delanta y esey ta fomenta entrada pa Gobierno di Aruba y alabes ta alivia e proceso administrativo, specialmente pa DIMAS, di renobacion. Pero esey no ta kita e parti esencial di control cu ta fundamental.

Otro cambio esencial den e manual di admision di 2023 ta cu permiso di reunificaicon familiar a bira posibel pa mas caso, pues pa matrimonio, union registra, contract di conviviencia, sin distincion di sexo.

Tambe den e manual di admision nobo, despues di cinco aña di estadia legal na Aruba, e persona cu ta renoba permiso no mester pasa DPL mas.

Diferente na e manual di admision anterior, den e manual di admision nobo a amplia e lista di migrantenan altamente cualifica y a introduci un permiso pa proyectonan special. Esaki esencialmente ta nifica cu e solicitante ta haya un pre-aprobacion.

Minister Croes a splica cu tin varios proyecto importante pa economia Arubiano y pa turismo Arubiano andando, y tur ta kehando cu no tin suficiente trahado. Gremionan tambe semper a reclama cu mester bin cu un proceso mas agil di permiso.

Anteriormente e prome permiso no tabata ser entrega y e di dos permiso e solicitante mester a warda riba esaki den exterior. Aworaki e prome permiso si ta ser entrega y solicitantenan mester bandona e isla pa warda e permiso keda cla.

“Un integracion responsabel, efectivo ta tumando luga pa hopi aña caba y ciudadanonan di diferente nacionalidad ta integrando efectivamente den e mercado laboral. Nos ta prefera pa nan keda Aruba y traha legalmente y contribui na tur prima y impuesto, cu toch nan keda Aruba pero traha ilegalmente,” el a enfatisa.

El a menciona cu tin diferente proyecto di hotel cu ta atras pa falta di trahado y un di e cambionan cu a bin cune ta pa acomoda e interes y acelera implementacion di e proyectonan aki cu e proceso di pre-aprobacion.

Minister Croes a toca tambe e tema di DREAMERS. Den gobernacionnan anterior tabatin e tema aki na unda hobennan cu nan famia a bin y hobennan cu ta bay scol na Aruba pero cu ta ilegal, ora nan haci 18 aña nan no por continua pasobra nan no tin permiso y door cu nan a bira mayor di edad.

Aworaki a introduci permiso di estadia cu garantia pa e hobennan aki. Esaki ta nifica cu un persona conoci, un familiar, ta firma pa e persona no mester bandona e isla despues di cumpli mayoria di edad.

Pa loke ta e casonan humanitario, e minister a indica cu esaki ta un instrumento cu nan ta keda usa y tin hopi casonan humanitario cu mester tene den consideracion. Tin regla pa esaki, e ta strictamente humanitario y caso pa caso nan ta wordo evalua.

Permiso pa personal di cas tambe a conoce un cambio. A introduci co-garantschap (co-garante) pa permiso pa personal di cas. Como ehemplo, Minister a Croes a splica cu por ta den caso di un pensionado cu mester hende pa cuid’e y yuda na cas, pero su pensioen no ta yega e norma di entrada, cu ta Afl. 2.040.

Den e manual di admision nobo ta cu un yiu of familiar por ta co-garante pa e permiso di personal di cas unda cu e entradanan ta wordo tuma hunto, e personanan no mester biba na e mesun adres, pa asina yuda yega na e norma necesario pa por tramita un permiso pa personal di cas.

Pa personanan cu ta practica deporte, Minister Croes a indica cu antes tabatin un limite di cuater aña pa e personanan aki, pero aworaki a elimina e limite aki. Tambe aworaki un hende cu ta bin pa haci deporte, no por spera cu e ta bay haci deporte so, pues cu e manual di admision nobo ta permiti e deportista traha pa e mantene su mes.

Por ultimo, pa personanan cu ta busca permiso di inversionista, e cambia e norma di inversion y esaki a baha na 150 mil. Minister Croes a remarca cu ta sali for di e punto di bista cu despues di pandemia tur hende a haya un golpi economico duro y pa e motibo aki a baha norma. Y inversionistanan cu inverti den centro di Oranjestad of San Nicolas, e norma ta cero.