Den luna di juni a bira conoci cu Departamento di Impuesto (DIMP) a logra elimina atraso den procesamento di cobransa di inkomstenbelasting despues di mas di 40 aña. Un logro grandi pa e organisacion cu ta trece cune beneficio pa contribuyentenan di belasting, entre otro pago di restitucion.

A pesar cu a elimina e retraso den procesamento di cobransa di inkomstenbelasting, ainda e proceso di pago di restitucion no a ser finalisa. Bon Dia Aruba a tuma contacto cu director di DIMP, Luenne Gomez-Pieters pa puntra tocante e pago di restitucion.

Gomez-Pieters a indica cu manera DIMP a informa den luna di mei, e departamento a caba di procesa tur formulario di inkomstenbelasting masalmente. Pago di restitucion ta sucede tur diahuebs segun secuencia di fecha. El a remarca cu na momento cu un contribuyente ricibi su cobransa na cas, ta hopi importante pa wak ki fecha (‘dagtekening’) esaki ta carga.

Na momento cu un contribuyente entrega su declaracion, mesora ta hinca e informacion di su declaracion den e sistema automatisa segun e sistema di “first in, first out”. Aki ta na unda e fecha di cobransa ta hunga un rol importante.

E sistema “first in, first out” ta nifica cu esnan cu a entrega nan declaracion prome lo ricibi nan cobransa definitivo mas prome y na su turno contribuyentenan cu ta spera di haya placa back, lo por ricibi esaki mas prome tambe.

Den un video publica ariba pagina di Facebook di DIMP, e organisacion a duna splicacion di e origen di e retraso y con a yega na un solucion pa esaki. E atraso den procesamento di cobransa di inkomstenbelasting tin un origen di mas di 40 aña atrasa. Esaki a ser causa primordialmente pa e falta di personal.

Na aña 1986 ora cu Aruba a haya su Status Aparte, gran parti di e belasting ambtenaarnan di e tempo ey a scoge pa bay traha pa Antias y un parti a keda na Aruba. Esaki a cuasa cu den un solo biaha un grupo mas chikito mester a cubri e trabao cu antes tabata ser realisa pa un grupo mas grandi.

Anselmo Croes, pensionado y ex-funcionario tecnico fiscal na DIMP, a splica cu cierto momento nan a cay atras y nan a ricibi hopi aanslag cu mester a wordo traha na mesun momento. “Nos a lucha hopi pa aanslagnan ta bij, pero nos no por a logra pa motibo cu cada aña e ta acumula y keda bira mas y mas hopi y nos tabatin solamente cierto cantidad di trahadonan cu tabata haci e, trabao.”

E tempo, el a indica, nan tabata haya stapelnan grandi pa traha riba dje y nan tabata mara na cierto produccion pa dia, pues nan mester a traha un cantidad di aanslag pa dia.

Croes ta recorda cu nan momento cu nan ricibi e stapelnan di file, nan mester a pasa door di e file pa wak cuanto aanslag ta habri y nan tabata traha riba tur aanslag habri te na momento den e aña ey, den sentido cu si por ehemplo nan tabata bezig cu aña 1985, nan tabata traha te cu 1985 a pesar cu por nan tabata den un otro aña.

E aanslagnan tabata ser traha manualmente. Croes ta conta nan tabata ta nota tur e informacion riba un formulario, e formulario ey nan tabata manda pa departamento di computer y e departamento aki tabata traha e aanslag. Despues e aanslagnan mester a wordo controla y pa asina nan por a bay riba caya.

Gomez-Pieters a splica cu procesonan cu ta pasa den e organisacion hopi biaha ta procesonan complica y nan a mira cu segun añanan ta pasando y e cantidad cu e contribuyentenan ta treciendo, nan no por a sigui traha di e mesun manera y spera un resultado diferente.

“Cu esaki, conhuntamente cu ekipo di Departamento di Impuesto nos a bay na mesa y nos a mira kico nos por haci pa duna un balor agrega na nos contribuyentenan. Y eynan a nace e idea pa bay digitalisa mas tanto di nos procesonan cu ta crea balor agrega pa nos contribuyentenan,” Gomez-Pieters a indica.

Specialista di inkomstenbelasting y loonbelasting, Angeline Geerman-Giel a remarca cu nan a otorga alrededor di 40 mil pa aña, pero den cada aña nan ta regel mas o menos 25 mil pa 100 mil aangifte, locual kiermen e volumen di aangifte cu mester wordo geregeld ta mucho mas halto cu locual an ta otorga cada aña pasobra den un aña nan ta regel mas cu un belasting jaar.

Awendia e proceso ta diferente y mas facil. E informacion ta wordo hinca den e sistema, ta hopi importante pa tur informacion ta corectamente yena y pa tur comprobante t’ey pasobra ora cu e informacion drenta den e sistema y tur cos ta bon, gran parti di e proceso ta wordo realisa door di e sistema mes locual ta yuda pa e proceso bay hopi mas lihe aworaki, compara cu antes.

Pa finalisa, Gomez-Pieters a gradici su ekipo completo di DIMP pa e logro historico aki. “Mi no por hacie mi so, mi ta haciele hunto cu e ekipo di departamento di impuesto. Mi ta sumamente orguyoso di e momento den tempo cu nos ta para awe. Nos departamento a pasa den un periodo hopi dificil, mirando cu nos a sigui traha den pandemia, nos mester a atende cu tur e efectonan di e pandemia y nos a hacie exitosamente. Esaki ta un momento cu nos tur ta hopi orguyoso di e logro aki. Un momento historico caminda cu mas di 40 aña nos a traha cu retraso den inkomstenbelasting, awe finalmente nos ta para na e punto di crusada caminda nos por bay traha den actualidad.”