Ayera mediante un comunicado di prensa, un grupo di habitante di Seroe Colorado a informa cu e permiso di construccion di Three Rivers ta keda suspendi. Esaki ta resultado di e decision di presidente di Corte Comun di Corsou, St. Maarten, Boneiro, St. Eustatius, Saba y Aruba cu a tuma luga na fin di mei.

E presidente a considera como no-admisibel e peticion di minister pa Asuntonan General, Innovacion, Organisacion Administrativo, Infrastructura y Ordenanza Espacial den su peticion pa un provision temporario pendiente di decision di Hof.

Prome Minister Evelyn Wever-Croes, como minister encarga, a acerca Corte Comun pa e provision temporario despues cu Corte di Prome Instancia, dia 5 di mei ultimo a determina cu e permiso di construccion di Three Rivers ta automaticamente suspendi na momento cu habitantenan di Seroe Colorado, representa pa mr. Boyce, a entrega obhecion.

Three Rivers Real Estate a ricibi un permiso di construccion pa e hotel na Sero Colorado y ciudadanonan, entre otro, habitante W. Werkema, a entrega un obhecion (bezwaar). Pero e minister a decreta cu e ciudadano no tabatin motibo pa entrega tal obhecion. Den e caso sumario entama pa W. Werkema y otro habitantenan, corte a rechasa e peticion di Werkema pa impone e suspension den e caso sumario pa motibo cu no tabatin urgencia den e caso; pero basa riba articulo 59 di e bouw en woningverordening, e permiso di construccion ta keda automaticamente suspendi.

Manera a menciona, prome minister Evelyn Wever-Croes, como minister encarga, a acerca Corte Comun pa apela contra e decision aki. Prome minister tabata kier pa presidente di Corte Comun pone e interpretacion di Corte Administrativo un banda te na momento cu Corte tuma un decision definitivo den e caso andando, esta e bodemproducedure.

Segun prome minister, no por suspende e bouwvergunning a base di ley, debi cu no tabata trata aki di un permiso condicional sino un permiso sin condicion.

E decision di presidente di Corte Comun pa mantene e decision di Corte Administrativo, LAR, ta ilustra e balor di articulo 59 di e Bouw en Woningverordening. Por medio di e articulo aki, tur ciudadano por apela decision di Gobierno na momento di otorga of planea di otorga permiso di construccion na cualkier proyecto, grandi of chikito, si no a tene cuenta cu interes di e propio ciudadano y interes comun.

Esaki ta di suma importancia mirando e hecho cu te awor na Aruba e permisonan di construccion no ta publica den medionan di comunicacion na ora di otorgamento di tereno.

Pa e motibo aki, e ciudadano no ta semper na altura si un edificio ta remodela of construi banda di su propiedad, loke ta haci cu e ciudadano ta core riesgo di ta laat pa entrega un apelacion. Na mesun momento esaki ta trece of ocasiona daño na esun cu e permiso pa construi cu a otorga na Pais Aruba y pa tur su habitantenan. Cu articulo 59 (Bouw en woning verordening) e permiso di construccion na cualkier proyecto, grandi of chikito ta suspendi te ora e disputa legal pa cu e permiso di construccion ta keda cla.

Permiso suspendi

Dia 6 di mei ultimo, grupo di habitantenan di Sero Colorado mediante un comunicado dirigi na medionan local a informa cu pa ley, e proyecto Three Rivers tabatin un permiso di construccion suspendi y como tal no tabata autorisa pa a sigui traha riba su proyecto di hotel ‘Secrets.’

Den comunicado ey, nan a indica cu hues di Corte Administrativo, Lar, Mr. W.C.E Winfield a considera cu e peticion di e ciudadanonan pa Lar bisa Gobierno pa suspende e permiso di construccion no tabata necesario, motibo ta cu articulo 59 di e Bouw en woon verordening, ta bisa cu na momento cu ta apela e permiso aki, mester para tur construccion pendiente di resolucion.

Como tal, e proceso di Gobierno pa permiti e construccion a continua, sin cu a atende cu e obhecionnan di habitantenan mes, a bay contra e ley y crea riesgo financiero innecesario pa tanto Pais Aruba y e desaroyadornan.

Tabata na november di aña 2019 tempo cu minister di Turismo, Dangui Oduber a anuncia e “groundbreaking” di Secrets Baby Beach Resort na Baby Beach. E proyecto tabata trata di un hotel “all inclusive” cu 900 camber segun ROPV ta indica.

Un total di 10 ciudadano, representa pa abogado Maritza Boyce, a acudi na Corte Administrativo, LAR, despues cu minister di Desaroyo Teritorial, Infrastructura y Medio Ambiente e tempo ey a entrega permiso pa construccion di hotel. E permiso tabata otorga dia 28 di mei 2020 y e ciudadanonan a entrega nan obhecion contra e permiso dia 21 di october 2020.

Pero e minister a rechasa e obhecion dia 9 di maart 2021 y consecuentemente, e ciudadanonan a apela esaki dia 16 di april 2021. Nan a informa cu corte den su prome sentencia a bisa cu tanten cu e minister encarga, kende ta den persona di minister presidente Evelyn Wever-Croes, no responde na e obhecion di e ciudadanonan, no por sigui cu e construccion.

Gobierno a base di decreto di 9 di maart 2021 a bisa di no ta considera e obhecion admisibel, cu a pone cu e ciudadanonan a apela na Corte Administrativo dia 15 di april 2021. Hues den su sentencia a considera cu e habitantenan tabatin rason den dos di su argumentonan y a instrui Gobierno pa denter di tres luna di e sentencia tuma decision riba e obhecion.

Sinembargo, Gobierno y Three Rivers a apela e sentencia aki y Corte a duna sentencia menciona caba dia 24 di mei 2023.

Prome cu construccion a cuminsa e grupo di ciudadano a pidi informacion di kico e proyecto aki tabata encera pero nan no a haya transparencia for di comienso manera nan ta sigura, den nan opinion e desaroyador mester ta mas cauteloso debi cu hotel ta trece hende, como por ehemplo taxistanan, operador di tours y trahadonan loke ta trece movecion  y den ROPV ta indica cu ora ta construi mester tene na cuenta cu e desordo constante cu esaki ta bay trece na habitantenan di Sero Colorado.