For di varios dia caba, parlamentario di fraccion di partido MEP, Setty Christiaans-Yarzagaray ta den un delicado estado di salud, y relaciona cu esaki, prome minister Evelyn Wever-Croes a señala cu pronto e lo ta back den parlamento.
Notando speculacion cu ta core rond den comunidad, Bon Dia Aruba a acerca prome minister Evelyn Wever-Croes pa e duna un comentario riba e situacion di parlamentario Yarzagaray, na unda te hasta a yega di scucha rumornan cu su stoel lo por haya reemplaso proximamente pa otro miembro di partido – cu legalmente lo mester bira Guillfred Besaril, ex-minister plenipotenciario, esun cu tin cu tuma e funcion ey.
Sinembargo, prome minister a sigura cu esey no ta e caso na e momentonan aki.
“Parlamentario Setty Christiaans-Yarzagaray ta den hospital pa finalisa un tratamento. Den curso di e siman aki e ta bay cas back y e ora por cuminsa bolbe back na trabao. Su recuperacion total lo tuma mas tempo, pero esey lo no strob’e di cumpli cu e debernan den Parlamento. Pues nos no tin mester di reemplas’e den Parlamento.”
Igualmente, parlamentario y lider di fraccion MEP, Shailiny Tromp-Lee a sigura dia 14 di juni den un declaracion pa prensa cu “pa nos fraccion, Setty ta un miembro hopi valioso, un persona cu ta aporta grandemente na nos produccion di nos fraccion y na e momentonan aki a mi como lider di fraccion a bis’e e tin cu tuma tur su tempo y espacio pa concentra riba su salud propio, concentra di bira bon lo mas pronto cu ta posibel y mantene nos informa riba esaki. Speculacionnan tin pa loke ta trata su recuperacion of impacto di no ta presente, a mi ta haya cu nos mester mira con su recuperacion ta desaroya, con e ta bay keda trata y nos lo deal cu e situacion manera esaki ta bin.”
