(USAToday)—Menopausa specialmente ta asocia cu un sintimento di preocupacion. Parcialmente, esaki ta pa via di e diversidad di sintomanan cu hende ta spera durante menopausa, pero tambe pa via di ideanan falso cu durante menopausa, cu un muhe perde su miho momento. Pero e manera di pensa aki ta hopi leu for di berdad.
Aunke tin cambio hormonal y sintomanan cu por acompaña menopausa, esaki ta un fase, no un malesa, segun Dr. Jen Gunter, autor di “The Menopause Manifesto.” Bo ta experenciando algun cambio fisico, y tin biaha bo por tin sintomanan desagradabel manera acne of depresion, y e problemanan aki por ser trata. Pero si bo no tin ningun sintomanan, no mester haci nada.
Kico ta e 3 fase di menopausa?
For di un perspectiva medico, tin tres fase di menopausa:
- Transicion di menopausa of pre-menopausa. Esaki ta e periodo prome cu bo ultimo menstruacion, unda nivelnan di estrogeno ta cuminsa baha y sintomanan tipico ta cuminsa. E sintomanan aki por inclui menstruacion iregular, sekedad vaginal, calor intensivo, sodamento anochi, iritabilidad, depresion y mas.
- Menopausa, cual ta ser defini como un aña despues di bo ultimo menstruacion. Den e fase aki bo por experencia sintomanan di transicion di menopausa tambe. Perimenopausa ta un otro termino cu por ser uza—esaki ta referi na e transicion pa menopausa y e prome aña despues di bo ultimo menstruacion.
- Post-menopausa, tur bo bida despues di bo experencia di menopausa.
Ki ora menopausa ta cuminsa?
Gunter ta bisa cu cuminsamento di menopausa ta mas o menos na edad di 45, pero esaki por varia hopi.
Sintomanan y tratamento di menopausa
Gunter ta critica e discusionnan tocante tratamento cu ta limita na estrogeno y terapia hormonal pa menopausa. Aunke nan ta parti importante di e repertorio di tratamento, nan no ta trata e salud di hende muhe holisticamente. Gunter ta splica cu e enfoke tocante tratamento ta depende di e sintomanan cu ta causa mas problema.
Algun di e sintomanan mas comun manera calor intensivo y sodamento anochi ta reacciona miho na terapia hormonal pa menopausa. Y aunke tin algun riesgo, esaki ta un opcion sigur y por yuda cu hopi sintomanan di menopausa. Pero esaki no ta adecua pa tur hende, manera hende muhe cu tabatin cancer di pecho of cu ta na riesgo di esaki.
“Tin un porcentahe chikito di hende cu no por tuma esaki. Tambe tin hende cu no kier tuma hormoonnan pa diferente motibo of cu no ta gusta con nan ta sinti mientras nan tuma nan. P’esey ta importante cu nos no ta papia solamente tocante hormoonnan como e unico metodo di tratamento. E combersacion a bira solamente tocante nitrogeno. E no a bira un combersacion tocante e experencia mas amplio y tocante tur cos cu nos por haci,” Gunter ta argumenta.
Menopausa simplemente ta un transicion biologico, manera pubertad. E por ta relativamente suave of duro. Por medio di mantene bo mes activo, practica cuido personal y papia cu bo dokter por alivia sintomanan.
