Recientemente tabata den corte e caso di asesinato di e hoben Sayuri Petronia, y durante e huicio, a dicidi pa trata e sospechoso principal, I.P. como un adulto. A dicta sentencia di 9 aña, mientras cu e otro sospechoso, Z.C. a ricibi un sentencia ahusta hubenil di 2 aña PIJ – den instituto hubenil. E acusado a dicidi pa apela, y awo e sentencia ta bay tuma lugar dia 15 di juli proximo, segun informacion den medionan di comunicacion local.

E caso aki a keda posponi anteriormente. Aña pasa, hues di Corte di Prome Instancia a pospone e caso di asesinato di Sayuri Petronia, debi cu rapport psicologico di e sospechosonan no tabata completo y awor mester yama psikiatra experto di Corsou pa bin Aruba y por traha e rapport aki.

E caso lamentabel aki a tuma luga dia 4 di juni di aña 2021 na Flamboyantstraat, unda polis a haya notificacion cu un persona hoben di 20 aña di edad a ser haya na un cas cu un tiro fatal na su cabes. E mesun dia di e asesinato di Sayuri, dos persona di inicialnan “Z.C.” y “I.P.”, ambos cu 17 aña di edad, a keda deteni en conexion cu e caso aki como e dos sospechoso principal.

“Z.C” y “I.P” tabata sospecha di intento di homicidio, menasa, ladronicia cu violencia y posesion di arma di candela. “I.P” ta esun acusa di intencionalmente tira mata Sayuri, na momento cu el a los tiro cu arma di candela riba dje, igualmente cu “Z.P”, kitando e bida di Sayuri.

Na februari di aña pasa, e caso aki a cuminsa haya forma; na juni a trat’e di manera parcial, pero el a wordo posponi pa tres siman – segun e abogado di un di e sospechosonan a señala na e momento ey – pa motibo cu e psikiatra no tabata cla cu e rapport psicologico. Supuestamente a palabra cu lo mester a traha e rapport psicologico lo mas pronto posibel, pero segun e abogado a sigura, e cantidad di caso na e momento ey tabata halto y e cantidad di hende cu mester a haya ayudo tabata halto, lo cual ta haci cu e cantidad di psikiatra y psicologo na Aruba ta limita y no ta abarca e demanda cu tin. “E ta un problema cu nos ta topa basta frecuentemente y esey mi ta kere cu a ocasiona cu den e caso aki no a caba na tempo”, abogado Demis Illes, representante di un di e sospechosonan, a comenta e tempo aya. Asina tempo a pasa, y finalmente a trata e caso aki dia 24 di juni ultimo, cu e resultado menciona.

Pa cu esaki, abogado di sospechoso I.P., Albert Kock, a bin dilanti den prensa pa trece aclaracion riba e hechonan di e caso.

“E caso unda un hoben mucha muher (Sayuri Petronia) a perde su bida a bin hopi dilanti den prensa. Hasta na luna di juni 2023 ainda ta bin den prensa bisando cu Sayuri a ser “mata”, pues indicando cu Sayuri lo a ser “mata deliberadamente.” Publico pues ta bay pensa cu aki ta trata di un caso cu un hoben a ser asesina intencionalmente. Esaki no ta berdad!” Kock a señala den un comunicado di prensa.

Kock a indica cu “como abogado di e mucha homber envolvi (I.P.), mi ta haya mi mes obliga di splica e caso, awor cu Hues den promer instancia (eerste aanleg) a dicta sentencia y cu e mucha homber envolvi a apela e sentencia di hues na Corte Superior.”

 

Hues di Eerste Aanleg (Corte) den su sentencia di 5 october 2022 a husga como lo siguiente:

“Igual cu e Fiscal, Corte ta husga cu for di e dossier (documentonan) y loke a bin dilanti durante tratamento di e caso a resulta cu e sospechoso IP no tabata intenciona e morto di Sayuri. Hues ta sigui bisa cu e ta haya su mes dilanti e pregunta si por papia aki di “voorwaardelijk opzet””, segun Kock ta indica.

“Voorwaardelijk opzet” ta ora un persona a causa resultado di algo (manera morto di un persona) unda bo por bisa cu e persona, cu su acto, a expone su mes “a sabiendas y voluntariamente” na e chens grandi cu su acto lo POR causa morto di e otro persona. Pues ban bisa, bo NO tin e intencion di causa su morto pero cu bo acto iresponsabel bo a causa su morto.

Anto e Hues di Corte na Aruba a conclui cu tabatin voorwaardelijk opzet di IP, Kock a bisa.

Fiscal a pidi 9 aña y Hues a duna IP 9 aña di prison.

Despues, Kock a bay over na splica nan version di e hechonan cu a conduci na e morto di Sayuri Petronia:
“E anochi di e morto tragico di Sayuri tabatin 3 persona den e cas (IP, Sayuri y ZC). ZC a bin cu e arma, a pon’e riba mesa den sala. E promer cu a hunga cu e arma tabata Sayuri, luego IP, anto hungando cu e arma, e pia di e stoel di plastic blanco lo a dobla y dede di IP accidentalmente a primi riba e trekker (gatillo) di e arma, bala a sali y a dal Sayuri, cu net na e momento ey a lanta para, den su cabes. E unico persona presente como testigo tabata zc. zc na recherche y na corte papiando cu hues semper a keda ripiti e palabranan: “e (ip) NO POR A YUDA”, pues bisando cu loke a pasa tabata un accidente.

“Hende no por imagina su mes un accidente mas tragico, pasobra Sayuri y IP tabatin bon amistad cu otro. Nan ta bisiña y Sayuri, manera un ruman muher grandi di IP, sa scual IP ora e laga su cas y cura sushi. Tambe Sayuri sa trece cuminda pa IP, cu tabata bibando su so den e cas. IP tabata e momento ey un menor di edad di 17 aña, cu nunca antes a tira cu un arma. E tabata un mucha cu a cay den mal influencia di otro muchanan cu si tin mente criminal, y IP tabata bayendo asina den mal caminda. P’esey cera IP den Kia pa 9 aña NO ta un solucion. E mester haya oportunidad pa ser poni den un Institucion pa menornan pa asina nan trata cune pa cambia su bida completamente.

Segun Kock, hues a duna un castigo mas pisa di loke ta husto den e caso aki, debi cu e caso a hala hopi atencion publico. “Ta hopi claro cu fiscal y hues di Aruba a dicidi di duna 9 aña pasobra e caso di IP a bin dilanti den publicidad comosifuera ta trata di un asesinato cruel intencional y Fiscal y Hues tin miedo di e opinion publico si nan no duna un castigo largo.”

 

Pa finalisa, Kock ta conclui cu mirando cu e castigo ta demasiado pisa teniendo e circunstancianan menciona na cuenta, nan a dicidi di apela. “Pues como cu e sentencia di Hues di Corte di Aruba, pa loke ta e castigo, ta incorecto y no ta cuadra cu decisionnan den casonan similar, a apela e decision di Hues di Promer instancia.”