A pesar cu tempo tabata mustra un otro situacion, organisadonan di Fun Run and Walk di EPI a señala cu e actividad tabata mustra cu lo mester a cancela, pero despues nan a dicidi di continua cu esnan presente, na unda cu pa 7:30 di mainta tur cos tabata prepara pa cuminsa.
Segun Julissa Arends, vocero di studiantenan di unidad di Salubridad y Servicio di EPI, pa 8:15 di mainta tabata haci e registracion tanto pa e careda como pa e caminata na unda a participa tanto studiante, ex-studiante, docentenan como comunidad den general cu ta gusta haci actividad fisico.
Pa 8:15 mainta solo a sali y e mainta tabata fresco, unda cu Polis tabat’ey pa brinda siguridad y acompaña e coredonan y esnan cu tabata cana, ademas di e hurado cu tabata rond pa controla si tur cos tabata cana bon.
E actividad a cuminsa y a culmina na e mesun luga, cu tabata e Gate 3 na Venusstraat. E prome coredo ganado tabata Camilo Gomez (ex-studiante di EPI), ken ta un deportista di coremento. Pa categoria di canamento e ganado a resulta di ta un empate, pues nan a pasa e liña pareu, nan ta Zoraida Godoy y Geraldine Albertsz y esey den mas of menos 61 minuut.
Directora general EPI, Ankie Danker tambe a cana e ruta y por tabata presente pa duna e premio na e ganadonan, cu tabata 200 florin cash pa e prome premio; pa loke ta e premio di grupo esey a keda aden y ta bay pa e meta di e actividad, cu ta mita placa ta pa yega na e instrumentonan di brassband EPI breed y mita ta bay pa e sociaalfonds di EPI mes.
Arends a señala cu Studentenraad S&S no a yega e meta, pero asina aña escolar nobo habri tur e unidadnan lo uni y lo sigui traha pa e meta comun aki cu ta forma un brassband di EPI.
