Kita BBO na frontera… Y BTW for di caminda…?

De repente no tin ningun urgencia mas pa pasa e ley di cambio den BBO, pa inclui e cobro di BBO na frontera? E ley cu tabata programa pa keda aproba pa mas tarda den luna di mei, awor ta bay keda trata den parlamento probablemente na luna di augustus.

Nos ta yegando fecha di inicio di reces di Staten y no lo tin tempo mas pa trata e proyecto di ley. Cu esaki e entrada cu gobierno tabatin proyecta, di siete luna cobrando esaki desde 1 di juni, lo a duna un bon suma di alrededor di Afl. 40 miyon. Cu entrada na vigor na september a keda solamente cuatro di e siete lunanan, loke ta casi corta e suma anticipa na mitar.

Pero, gobierno ta bay lamenta e placa ey cu no ta bay drenta? Si nos por kere e cifranan di Banco Central, cu ta haya nan for di e mesun departamentonan responsable di gobierno, anto e suma cu ta drentando a base di e aumento di BBO cu un 1%, combina cu e recuperacion economico, ta cumpli caba pa gran parti cu e meta di extra entrada cu gobierno tabatin planea pa e aña aki.

Impuesto indirecto, e categoria na cual BBO y su adicionnan ta pertenece, lo mester crece di alrededor di Afl. 600 miyon na 2022 te Afl. 715 miyon na 2023. Ta resulta awor cu e aumento di BBO lo ta bay ta casi Afl. 100 miyon, sin introduccion di e BBO na frontera. Mester tuma na cuenta cu e otro impuestonan indirecto manera impuesto di importacion y riba acomodacion turistico tambe ta aportando mas a base di e crecemento economico actual. Ta bien posible anto cu e introduccion di BBO na frontera lo solamente trece mas placa aden, sin cu esey ta necesario pa cumpli cu e meta presupuestario.

Esey por ta splica e actitud bastante tranquil di banda gubernamental den e asunto aki, pasobra nan lo sa di basta dia caba cu no mester tin pura? O esaki ta mas bien algo di suerte, cu e medidanan tuma na inicio di aña ya tabatin tanto exito, cu ta bin yuda gobierno pa sali di e problema cu nan tin cu e ley cu no por a keda cla? E proceso di prepara e ley tabata un problema di ineptitud di esnan envolvi, o ta conscientemente a tarda e proceso, pa algun otro motibo? Nos no sa e contesta corecto ainda, pero duna ‘tempo na tempo’. Di tur manera, tin algun otro asunto ta bin dilanti, mirando e situacion actual.

Por ehemplo, si no tin tanto necesidad di introduci e BBO na frontera den pura, ta keda e pregunta kico ta haci si no tin un inicio pa bay den direccion di un BTW, pasobra a ‘bende’ e BBO na frontera como un prefase pa BTW, cu e mecanismo ‘in place’ di un BTW, cual ta e restitucion di BBO, pa e empresario paga solamente BBO pa e valor agrega di su banda. Si no tin BBO na frontera, anto no tin nada di laga comercio custumbra cu e mecanismo di restitucion, pa despues implementa e BTW riba henter e proceso economico. Y si introduci e medida toch, e pregunta legitimo ta si gobierno no ta cobrando demasiado, mas cu nan mes a proyecta. Y esaki den un situacion unda poder di compra, sigur di e ciudadano cu entrada modesto, ta birando un problema grandi. Y ademas den un situacion unda e panorama internacional por mira cambio menos faborable durante e aña aki.

Sin embargo, si nos imagina cu no ta bin cu e BBO na frontera mas, nos no ta keda cu e problema cu mas ta primi nos cartera cu ta e efecto cumulativo di e 7% riba 7% den economia, fruto negativo di un sistema cu por a funciona ainda na 3% pero awor ta cuminza mustra cu e ta un sistema obsoleto cu mester desaparece mas pronto posible. Nos por wel di pensa esey, pero nos no ta mira e gobierno aki haci e cambio ey. Y pakico no? Por ta cu aki algun aspecto di orguyo partidario falso y equiboca ta hunga un papel, pa no laga un impuesto cay cu a nace den nan seno. E oposicion contra un BTW, mientras cu esnan cu e educacion necesario tabata masha bon cu esey ta e sistema pa introduci, ta bin di hopi aña pasa caba.

Den e fase anterior na introduccion di e BBO na 2007 mayoria di gremio empresarial no tabata na fabor di un BTW. Camara di Comercio tabata para su so e tempo ey den su apoyo pa un BTW, y a predeci loke ta mira awor di e sistema cumulativo aki, cu na 7% ta simplemente demasiado. Y si nos observa e desgana cu keto bay ta reina den e partido mayoritario den e coalicion ora ta papia di BTW, ta un indicacion cu ainda no tin mucho conviccion pa pasa pa e sistema aki, cu mundialmente ta ser aplica den gran mayoria di pais, grandi y chikito.

Ta interesante loke ta bay sucede proximamente. Si no introduci e BBO na frontera, no mester experimenta cu algo cu por bira un BTW, y gobierno por lo pronto tin suficiente entrada cu e 7% manera e ta awor. Esey por pospone introduccion di un BTW mas ainda, pero e partido ey lo no lamenta esey. Esun cu ta sinti e consecuencia ta e consumidor, cu ta keda castiga cu e acumulacion di 7 riba 7%. Pero, esey no ta relevante, toch?