Natalia Sarai Alvarado ta un hobencita di 12 aña di edad, e ta bishita Pius X School y ta den vierde klas. Recientemente Natalia a haya e oportunidad di bira periodista pa un dia y a haci algun pregunta na Prome Minister di Aruba, Evelyn Wever-Croes, un oportunidad unico y emocionante pe.

Natalia ta conta den un entrevista cu Bon Dia Aruba cu el a bira hopi contento ora cu su mama a dun’e e noticia y a bis’e cu e ta bay bestuurskantoor pasobra el a haya e oportunidad pa bira periodista pa un dia y haci pregunta na Prome Minister.

El a sigui conta cu el a wak e propaganda di periodista pa un dia riba internet y el a hay’e leuk pa participa y asina el a inscribi pa e oportunidad unico aki.

E dia cu e tabata prepara pa bira periodista pa un dia, Natalia tabata hopi nervioso, pero el a conta cu despues el a djis bay cu e coriente y tabata prepara pa haci su preguntanan. E ta conta tambe cu e tabata nervioso ora e mester a para dilanti e camara pa haci pregunta, pero despues el a sinti normal y tabata contento.

“Mi tabata hopi contento ora mi a haya sa cu mi tabata por haya e chens aki cu hopi no por y ta un bendicion cu tambe mi por yega na e logro aki,” el a bisa.

El a conta tambe cu e dia ey tambe tabata den e sala di prensa e periodista Patrick Everon y moderador Sandra Croes cu a splica nan e proceso di un programa live y nan a haya oportunidad di haci un practica prome cu e programa live cu Prome Minister. Esaki tambe a yuda hopi y a calma e nervionan.

Natalia a haci tres pregunta na Prome Minister: 1. cual ta e cos mas dificil cu Prome Minister ta enfrenta den su carera politico? 2. Si el a yega di sinti intimida of cuestiona pa e hecho cu e ta un hende muhe cu ta ocupa e cargo di Minister President na Aruba? 3. Ki recomendacion Minister President lo haci na e docente-, alumno- y representantenan pa asina minimalisa bullying na scol?

El a splica cu na prome instante e tabata kier haci pregunta personal na minister y tambe kico tabata e impulso di minister presidente pa scoge su carera politico. Asina el a formula varios pregunta personal y cu e ayudo di su mama cu a splic’e den ki direccion e dirigi su preguntanan.

“Mi mama a yuda mi pasobra no tabata na un bisiña of amiga cu mi tabata dirigi mi preguntanan,” Natalia a conta.

E pregunta di bullying escolar tabata un pregunta cu Natalia tabata pone hopi enfasis riba dje pasobra e ta wak cu bullying escolar ta intensifica diariamente na scolnan. “Tin biaha nos como mucha of hende muhe, e mucha of hende homber ta wak cu pa e hecho cu nos ta hende muhe nos ta mas debil cu e sexo masculino,” el a enfatisa.

Por ultimo Natalia ta conta cu ora e tabata chikito e tabata kier bira dokter, pero despues el a realisa kico e gusta y den realidad kico ta su pasion y el a realisa cu e gusta hopi actuacion. “Mi lo kier bira un actriz. Mi a participa den un show na scol pa dia di mucha y nos a gana e premio pa e bunita actuacion cu nos a haci. Si mi no bira actriz mi lo studia diseño grafico, haci animacion, manera cartoons etc.,” el a finalisa.