(AP) — Wilson a bira un heroe nacional na Colombia na momento cu el a yuda ehercito haya e cuatro mucha indigena cu a sobrevivi un accidente di avion y tabata perdi den selva Amazonico pa 40 dia.
Huella di pata di e cacho di buskeda militar a conduci trackernan na e muchanan e luna aki, pero e Belgian Shepherd a desaparece durante e buskeda, y awo e mes ta e obhetivo di un operacion sofistica di buskeda y rescate cu a cuminsa tiki despues cu e cuatro hoben sobreviviente a keda traslada riba helicopter pa Bogota.
Ehercito Colombiano a bisa cu a laga 70 soldad den e selva denso rond di sitio di e accidente pa busca pa su cacho stima. Y comandantenan a priminti cu no ta bay bandona e area remoto te cu e soldadnan bin cas back cu e cacho.
Ta un luna desde cu Wilson a perde den e selva, y ta dificil pa sa si e cacho di dos aña di edad ainda ta na bida. Pero e rescate di e cacho lo eleva e espiritu di hopi Colombiano y agrega un punto di alegria na un storia di sobrevivencia cu ya a captiva mundo.
“Pa nos tabata un honor cu nos cacho a yuda haya e muchanan,” segun sargento Luis Fernando Seña, e comandante di e scol di cacho unda a train Wilson durante 14 luna na Bogota. “Lo ta tremendo noticia pa e pais, y pa nos muchanan, si por hay’e,” Seña a agrega.
Wilson y cuatro otro cacho a ser hiba den selva na mei, pa haya e avion cu a crash. A duna Wilson algun pida paña pa hole pa busca e muchanan. E cacho a separa for di e team dia 18 di mei, despues cu a core bay den selva siguiendo un holor. Dies dia despues, ehercito a haya huella di muchanan banda di huella di e cacho. E pistanan a yuda nan yega mas cerca di e area unda a haya e muchanan dia 9 di juni, segun general Pedro Sanchez, kende a dirigi e esfuerso di buskeda. “E muchanan a papia cu nos y a confirma cu e cacho tabata cu nan pa dos of tres dia,” el a bisa.
