Algun edicion atras Bon Dia Aruba a elabora ariba algun di e recomendacionnan cu a ser presenta den e rapport “Level Playing Field”. E rapport aki ta presenta recomendacionnan pa introduccion di e sistema di BTW, cu despues no a ser introduci y a introduci BBO na frontera na su luga. Sinembargo, AHATA, hunto cu algun otro stakeholder di e gremio comercial y sindical, a aclaria cu nan no ta apoya ni aproba e rapport aki.
E rapport ser elabora pa un comite di tres experto, di cual AHATA hunto cu e otro stakeholders no tabata di acuerdo cu dos di e miembronan di e comision aki, cu a presenta 17 recomendacion pa introduccion di BTW e tempo ey. Varios miembro di e grupo di stakeholders, entre otro AHATA, no tabata di acuerdo cu e proceso cu a tuma luga pa crea e lista di recomendacion.
Sinembargo Camara di Comercio a entrega e rapport aki na Gobierno di Aruba y Prome Minister, Evelyn Wever-Croes, a remarca cu Gobierno di Aruba lo sigui trata e rapport “Level Playing Field” di 25 di october 2022, como un rapport di recomendacionnan di gremionan comercial y sindical, y lo sigui evalua e recomendacionnan cu por ser sigui.
Den e articulo di awe nos lo sigui elabora ariba e recomendacionnan cu e rapport ta sugeri na Gobierno di Aruba.
Aumento di prima di AZV y AOV pa empleadonan di horeca cu ta gana tips
E comite ta indica cu por lo menos ocho mil empleado den e sector di hotel, restaurant y recreacion (tours, watersports etc.) ta registra den AZV pa disfruta di e servicionan medico cu ta ser paga pa tur ciudadano cu ta tin un empleo. Igualmente, e sistema di AOV ta bay paga beneficionan di pensioen.
Sinembargo, pasobra tips no ta ser conta den impuesto di entrada, impuesto salarial of primanan social, un cantidad grandi desproporcional di e mercado laboral (aproximadamente 13%) cu ta ricibi e mesun beneficionan ta pagando menos contribucion compara cu otro empleadonan cu ta paga 100% di e prima di nan salario.
E ta conoci cu miles di empleado cu ta gana tips ta bay cas cu centenares di dollar pa siman, cu tin biaha ta conta pa cuater biaha of mas nan salario minimo, sin ningun retencion.
Pa tin contribucion cu ta ser realisa pa ciudadanonan den un manera husto y igual mas hopi cu ta posible, e comite ta recomenda pa considera recoleccion di AZV y AOV riba tips. Aunke e doñonan di trabao ta considera esaki como falta di solidaridad den comunidad, nan no ta desea di ta encarga cu e impuesto aki, pero pa e ser manda pa cada empleado.
Den e rapport e comite ta sugeri dos manera di recoleccion:
1. Aplicacion di Articulo 38 di e LV AZV, 38b paragraaf 4 implementando un cantidad fiho a traves di LB – H.A.M. pa ser paga mensualmente door di e empleado cu tin derecho ariba tips (administra pa dia of semanal pa e doño of manager di e tips paga cash, cu debit of credit card) cu ta riba payroll como un retencion adicional di AZV.
2. E opcion aki ta sugeri pa e empleadonan cu ta gana tips declara esaki boluntariamente ora di yena nan formulario di inkomstenbelasting. Un desbentaha ta cu esaki ta bay genera alrededor di ocho mil formulario di inkomstenbelasting adicional. Como cu mayoria di e empleadonan aki tin impuesto salarial como ultimo impuesto. Aumento di e costo di e administracion di e ocho mil fomularionan extra di inkomstenbelasting ta complica e situacion pa DIMP enbes di realisa un reforma simpel, un di e metanan di e rapport aki.
Aumento di participacion di migrantenan legal den financiamento di AOV, AZV y inkomstenbelasting
E rapport ta enfatisa cu tin un aumento di escasez di labor den sectornan creciente di e economia. E tendencia aki no ta bay disminui cu e 550 camber cu ta bay habri den e proximo tres aña. E tarifanan di ocupacion halto den e hotelnan existente despues di pandemia a aumenta e oportunidad di empleo den e sector di apoyo di turismo (restaurant, tours, car rental, recreacion etc.) Nan ta remarca cu companianan ta experiencia cu e bentanan ta ser afecta pa e falta di personal den cushina pa produci e producto y servicio cu ta ser bendi na e bishitante.
“Nos a yega e limite di forsa laboral disponibel localmente cu ta motiva pa traha den e sector di hotel y restaurant. Tin un cifra desproporcionalmente halto di posicionnan di trabao cu ta habri den e sector aki. Nos economia ta mono-productivo, nos mester suministra e cantidad grandi di posicionnan den e sector aki cu forsa laboral importa,” e comite a subraya den e rapport.
E ta remarca cu Gobierno di Aruba mester plania esaki bon y stimula e migracion di hendenan mas hoben y esnan mas interesa pa traha den e sector di otro economianan comparando na un tamaño mas chikito di nan sector di horeca compara cu Aruba.
E rapport ta recomenda lo siguiente:
1. Emiti un biaha so firma liber pa tur persona cu tin permiso di estadia na Aruba pa shete aña of mas. Cu e proceso aki miles di permiso di ciudadanonan cu ya ta integra den comunidad, e mayoria cu ta domina papiamento y Ingles basico, cu muchanan cu a nace na Aruba y hipoteca pa nan casnan, por sigui nan bida sin cu mester sufri cu e proceso di DIMAS cada aña pa renoba permiso.
2. Emiti un permiso di trabao rapido pa posicionnan clave cu tin aumento den escasez di personal. E nivel di servicio den e sector horeca ta depende di e empleadonan adecua. Miles di migrante trahado ta economicamente activo den e economia shinishi sin contribui na e fondonan di AOV/AWW y AZV pasobra nan no ta documenta. Integracion di e personal recluta pa doñonan di trabao pa unda nan tin mester, por genera miyones pa e fondonan social di AZV y AOV. E comite ta enfatisa cu cada mil permiso di migrante legalisa cu dos mil florin di entrada basico ta dos miyon di salario cu ta genera 13.5% pa prima di AZV y 9.5% pa prima di AOV/AWW cu ta bira, respectivamente 270 mil florin y 190 mil florin pa luna of 3.2540.000 florin y 2.280.000 florin pa aña.
E calculacion di e rapport ta varia entre cinco mil y dies mil trahado migrante indocumenta cu ta biba na Aruba solamente den e sector di horeca y construccion.
