Aruba ta bira pionero den Caribe pa e sistema Early Warning System cu lo yuda anticipa calamidad

Ayera a tuma luga un encuentro entre tur e miembro di Crisis Team na Bureau Rampenbestrijding Aruba (BRA) despues cu a haya e noticia cu Aruba ta financia door di Union Europeo pa haci un “Early Warning System”.

“Cualkier calamidad bo kier ta avisa, adelanta, e deseo a bin di Aruba ya di basta tempo y BRA tabata trahando den esaki, cu nos tabata kier un sistema in place cu por yuda nos anticipa riba kico ta bay pasa,” prome minister Evelyn Wever-Croes ken tabata presente den e encuentro aki a informa.

El a bisa cu esaki ta un sistema cu ta analisa por ehemplo, fenomenonan meteorologico, sismatologico y asina por yega na conclusionnan y duna avisonan trempan, nan ta bay duna training y preparacion pa e sistema nobo aki.

Importante ta manera prome minister a bisa, cu e aviso ta yega tur caminda, cu e avisonan ta den tur idioma posibel, cu por yega te hasta e persona cu ta hike den mondi cu no tin comunicacion pero e tambe por haya e informacion ey.

Tambe e sistema ta guia y yuda nan con ta cuminsa un proceso di evacuacion y con por tuma medidanan di precaucion, esey ta e sistema di Early Warning System. E meta ta pa tin mas siguridad y scapa bida di hende y minimalisa e dañonan pa asina haya e forsa pa recupera bek. Esfuersonan ta wordo haci pa logra un Aruba mas resiliente contra cualkier calamidad. Awo, a logra cu fondonan di Union Europeo, pa esaki bira realidad.

BRA a inscribi na Union Europeo pa e proyecto aki manera el a indica ademas cu pa haci peticionnan na Union Europeo no ta facil pa motibo cu tin masha hopi burocracia y ta complica.

E noticia a drenta cu Union Europeo ta financia 1.7 miyon euro pa e proyecto Early Warning System y cu esaki, Aruba ta bira un pionero den Caribe, un role model pa otro paisnan den Caribe, na unda Nacionnan Uni ya a stipula cu dentro di 5 aña tur pais den Caribe mester tin un sistema asina y Aruba ta canando adelanta den esaki.

“E echo cu nos a logra esaki, ta bisa hopi di nos. E dedicacion y profesionalismo di BRA y Crisis Team, sigur ta loke a yuda pa haci esaki posibel. Den nomber di Gobierno di Aruba, y di pueblo en general, mi ta gradici boso pa tur e trabounan cu boso ta haci pa logra esaki. Preparacion ta e miho forma pa sali y recupera di cualkier calamidad”, prome Minister Evelyn Wever-Croes a expresa.

Early Warning System, lo ta completamente operacional pa juni di 2024 caba, mientras ta bay ta preparando tur ciudadano di e isla y duna splicacionnan necesario pa esaki ta exitoso.