Acuerdo entre TPEF y Serlimar: Ta bay pone 100 bar’i sushi na costa di Aruba

Ayera mainta Minister di Turismo y Salud Publico, Dangui Oduber, a tene un conferencia di prensa na unda el a anuncia e acuerdo di cooperacion entre Tourism Product Enhancement Fund (TPEF) y Serlimar cu coordinacion di DOW pa asina pone 100 bari di sushi na e costa di Aruba.

Minister Oduber a splica cu TPEF lo haci e compra di 100 bari di sushi y esakinan lo ser poni den 10 area cu ta ser asigna pa DOW pa asina e ploegnan cu tin contract cu TPEF pa haci trabao di mantencion di limpiesa na e areanan aki.

Serlimar ta e compania encarga cu provee e barinan di sushi y tambe nan ta bay instala e barinan di sushi. DOW ta e Departamento encarga cu coordinacion di unda e barinan lo wordo ubica.

“E obhetivo ta pa nos mantene e areanan aki limpi na tur momento, un Aruba limpi sigur ta e imagen cu nos kier ofrece na nos localnan, pero sigur na nos bishitantenan. Pero sigur tambe p’esey e acuerdo di cooperacion aki ta asina importante y ya nos tin e barinan di sushi despues cu nos a hiba e proceso di destaho pa nos yega na e acuerdo cu Serlimar,” Minister Oduber a remarca.

El a indica cu tin diferente factor cu ta determina e exito di Aruba su turismo. Nan ta haci inversionnan den e mercadeo, nan ta enfoca ariba diversificacion, nan ta inverti continuamente den mehoracion di producto Aruba y den seguridad pa mantene Aruba e pais di mas sigur den henter Caribe contra e competidonan.

Den cuadro cu e anuncio di e acuerdo di cooperacion, otro factor importante ta e mantencion di limpiesa. “E acuerdo di cooperacion aki ta di vital importancia pa tin tur e areanan cu ta wordo mas frecuenta, mas bishita pa nos localnan y bishitantenan bon manteni,” el a bisa.

Na mesun momento al e haci un apelacion na e residentenan pa haci bon uso di tur 100 bari di sushi. E barinan lo ser ubica strategicamente cuminsando for di Arashi te cu Baby Beach.

TPEF ta encarga cu financiamento pa e barinan di sushi. E ta un fondo cu ta haci inversionnan den embeyecemento di producto Aruba y ta haci inversion den conscientisacion, den herencia cultural y tambe den medio ambiente y e proyecto aki ta forma parti di e post di medio ambiente.

Minister Oduber a splica cu pa aña 2024 TPEF tin varios proyecto ya caba presupuesta cu lo cuminsa den e proximo simannan cu ta bin. El a menciona e proyecto di embeyecemento di Eagle Beach, na unda full e caminda cuminsando for di e rotonde di Amsterdam Manor te na rotonde di Alhambra ta bay ser mehora.

Otro proyecto ta e proyecto di mosaico na Hooiberg. Ya caba Ministerio di Turismo a percura pa drecha tur e trapinan di Hooiberg y e siguiente fase ta pone mosaico. Otro proyecto cu el a menciona tambe, cu ta den planificacion y cu ta wordo financia pa TPEF, ta e proyecto di Rodgers Beach. Esaki ta parti integral di e master plan di Sero Colorado.

El a sigui splica cu ya caba fase tres di e proyecto di Baby Beach ta den ehecucion y ta bay ser entrega y na momento cu esaki wordo entrega, e siguiente fase, fase cuater, lo cuminsa cu ta bira e drechamento di e canchanan di tennis, un kiosco y restaurant. Paralelo na esaki ta bay cuminsa tambe cu e proyecto di Rodgers Beach.

E proyecto di e Boardwalk Malmok fase tres ta un proyecto unda ta percura pa embeyece e paisahe na Fisherman Hut y consecuentemente ora cu esaki keda cla ta bay sigui cu e di cuater fase di boardwalk Malmok na unda ta bay conecta Fisherman Hut y Ritz Carlton. E intencion, Minister Oduber a indica, ta pa conecta esaki te na Radisson Blu pa asina tin un solo caminda di boardwalk na unda por cuminsa na Radisson Blu y cana te na Malmok.

Nathalie Wolff, representante Serlimar, a duna un splicacion amplio di e barinan di sushi cu ta bay ser usa pa e proyecto aki. El a enfatisa cu e barinan di sushi ta funcional, ecologico y conforme e standardnan mas halto mundialmente na e momentonan aki.

Wolff a indica cu e barinan ta fabrica na Alemania y nan a wordo someti na diferente test, entre otro test di calor, pa sigura cu nan ta specificamente adapta pa resisti e clima di Aruba y nan ta contene maximo proteccion di UV.

El a agrega cu TPEF a pidi barinan cu ta ecologico, y pa esaki el a remarca cu menos ta mas. “E formula ta simpel, menos ta mas. Menos color, mas reciclahe. Tambe por bisa e material di e bari di sushi tin un duracion largo y ta 100% reciclabel.”

Wolff a sigui splica cu e barinan a bin den nan stand. E stand nan aki, el a resalta, a ser corta y midi cu exactitud pa asina fit e bari. El a agrega cu no tin ni un parti di e bari cu tin skinan skerpi, locual ta haci’e mas sigur pa publico usa y pa esnan cu ta encarga cu mantencion di e barinan.

“Nos ta sigur cu publico lo haci bon uso di nan y alabes esakinan a wordo instala pa nan

facilidad y asina ey nos tur por recrea y cuida nos medio ambiente na mesun momento,” el a termina.

Por ultimo, representante di DOW, Daryl Lue, a ratifica cu e rol di DOW den e proyecto aki ta pa supervisa e 10 ploegnan cu ta cay bao TPEF. El a indica cu den e ultimo lunanan DOW ta ruim op e 100 bari di sushi cu ta pertenece na DOW y el a remarca cu nan a encontra cu problema na algun di e localidadnan.

“Loke a encontra ta cu varios localidad tin hopi sushi. Prome tabata haci limpiesa un biaha pa dia y no den weekend, pero mester a adapta e operacion y asina a yega na cinco biaha pa siman dos biaha pa dia y den weekend tambe. Den e caso aki e mesun programa lo continua pa e ploegnan di TPEF,” el a bisa.

Pa e proyecto aki DOW a conseha e localidadnan mas strategico pa pone a barinan di sushi mirando cu e ultimo lunanan nan a encontra hopi problema. E problema mas grandi, Lue a subraya, ta cu asina hende wak un bari di sushi yen nan ta tira e sushi na banda.

“Den e caso aki mi ta urgi comunidad di Aruba pa no haci esaki. Asina bo wak un bari di sushi yen, please tire otro caminda,” el a enfatisa.

Pa loke ta e barinan di sushi di TPEF, Lue a indica cu lo pone esakinan cuminsando na Arashi te na Baby Beach. Lo pone bari na Eagle Beach, Lineair Park, den area di Zeewijk pa asina termina na Baby Beach y Rodgers Beach.

Por ultimo el a agrega cu pa e barinan aki ta bay haci adaptacion y bora un buraco den e tapa di e bari pa asina no habri e baki pa e ta un volumen mas grandi pasobra e ta precisamente pa tira sushi chikito den dje.