(AP) – President Frances Emmanuel Macron a haci yamado na nacionnan Europeo dialuna pa busca mas independencia den e defensa di espacio aereo y a boga contra depende demasiado riba Merca, un problema divisivo cu ta tuma un urgencia nobo den bista di e guera di Rusia na Ucrania.
Macron a trece dilanti e topico di Europeonan crea nan propio strategia di proteccion aereo den su speech di clausura na un conferencia pa ministernan di defensa y otro representantenan di mas o menos 20 pais cu a tuma luga na Paris.
E dialogonan a inclui combate anti-drone y defensa contra misil, segun e organisadornan Frances, notando cu Moscu su invasion di escala completo di Ucrania a mustra e importancia y efectividad di e ekiponan aki. “Nos mester sa cua e situacion di menasa ta y despues kico nos, como Europeo, por produci? Y kico nos mester cumpra?” Macron a declara.
Macron a pusha tambe pa fabricantenan di ekipo di defensa Europeo crea sistemanan militar independiente y relocalisa produccion den e continente. El a haci yamado tambe pa mehora e standardnan Europeo. “Dicon te ainda nos tin cu cumpra di Merca frecuentemente? Pa motibo cu Mericanonan a crea standard hopi mas cu nos, y nan mes tin agencianan federal cu ta provee subsidio masivo na nan fabricantenan,” el a splica.
E reunion di un dia a tuma luga banda di Paris Air Show, e evento mundial mas grandi cu ta enfoca riba aviacion y e industria di espacio cu a habri dialuna.
