(Infobae) – Un di e ultimo propuesta polemico cu presidente Gustavo Petro a haci tabata tocante gasolin y deficit di casi 30 miyon dollar cu tin den Fondo di Stabilisacion di Prijsnan di Combustibel (Fepc).
Di esaki, e mandatario a propone na e Colombianonan pa disminui e consumo di gasolin pa contraresta cu mas facilidad e deficit ey y genera menos aumento na e prijs di dje, e cual a cuminsa duna na luna di october 2022.
Despues di esaki, e ex-superintendente di Industria y Comercio y ex-vice minister di Husticia Pablo Felipe Robledo a afirma cu “na Gustavo Petro tin cu declar’e incapacita pa demencia”, Robledo a skirbi riba Twitter ora e referi pa un hues declara Petro demente of cu su facultadnan mental ta deteriora.
Pero esaki no ta prome biaha cu Robledo ta mustra contra di loke ta pasa cu Gobierno di Gustavo Petro. Debi na e polemica genera pa presunto placa ilegal, movi pa Nicolas Petro, yiu di e mandatario, den pleno campaña electoral na 2022, e ex-funcionario a publica e tuit di e presidente Petro di 2022 den defensa di su yiunan, di ken a bisa cu nunca lo a haci negoshi cu Estado.
E tuit ey di Petro tabata di dia 1 di juni, despues di e prome buelta electoral (29 di mei) y faltando poco dianan pa e segundo buelta di eleccion presidencial (19 di juni) y un tiki mas di un luna manera e chat entre Day Vasquez cu Nicolas Petro ta revela unda e yiu di e mandatario a bisa cu a transporta 200 miyon peso placa cash di Bogota pa Barranquilla sin lanta sospecha y evitando control di autoridadnan. E fecha di e conversacion entre Nicolas y su casa, segun Semana ta sostene ta di 15 di juli di 2022 ora Gustavo Petro ya a keda eligi como presidente.
