Durante algun siman caba, diferente districto di Aruba ta bin experenciando cortenan di coriente, y durante esakinan, den algun caso aparatonan a daña debi na cortenan di coriente inespera. E ola di calor ta aumenta e demanda halto di consumo, loke segun Elmar N.V a sigura, por ta un di e causanan di e interupcionnan di coriente.

Pa esaki, redactor di Bon Dia Aruba a tuma contacto cu vocero di Elmar N.V, Audrey Croes pa asina Bon Dia Aruba por informa debidamente kico ta sucediendo cu interupcionnan di coriente den diferente districto di Aruba.

Croes a señala cu e posibel motibonan pa interupcion den servicio di coriente ta inclui accident di auto riba palo di luz, black-out, fli pega riba liña di voltahe halto, demanda halto di consumo di coriente durante temporada di calor, paalbrand door cu no ta yobe y tin hopi stof (di Sahara) durante temporada di secura, corto circuito door di humedad halto durante temporada di yobida, of gevallen draad door di mata, fayo den ekiponan di halto tension, lamper por dal riba liña di voltahe halto durante mal tempo, of contratistanan cu ta coba y daña kabelnan di Elmar.

Croes a resalta cu regularmente Elmar ta realisa trabaonan di mantencion sin interumpi e servicio di coriente. “Nos ta transferi e carga pa sigui distribui coriente na e area por medio di un otro stacion, pa asina evita interupcion di servicio di coriente pa nos clientenan. Sinembargo, e proceso aki ta pone un esfuerso adicional riba kabelnan di e otro stacion, cu e posibilidad di aumenta e riesgo di corto circuito riba nan. Di otro banda, nos tin un plan di mantencion riba liñanan y stacionnan di voltahe halto cu si ta encera interupcion di coriente (shutdowns). Esakinan ta interupcionnan di servicio planea.”

Durante e temporada di calor, ta enfrenta cu e consumo di coriente ta aumenta. Esaki por afecta nan red di distribucion y nan kabelnan cu ta carga e coriente, ya cu nan ta someti na un aumento rapido y diripiente di consumo. E kabel ta traha pa wanta e extra carga aki, pero a consecuencia di e calor, e kabelnan ta bira mas cayente di lo normal, loke por crea un riesgo di corto circuito. Di otro banda, durante e lunanan mas fresco recientemente, nan a observa un minimalisacion di interupcionnan di coriente, ya cu e kabelnan ta keda exponi na un carga constante.

Durante di interupcion di servicio di coriente cu no ta planea, Elmar ta tuma e accionnan necesario pa reduci e tempo di e interupcion. Esaki ta nifica cu ta transferi e carga pa distribui coriente di un otro stacion pa e area afecta.

“Nos ta compromete pa cumpli cu nos deber pa brinda un servicio di coriente di calidad, y pa sigui inverti den mehoracionnan pa beneficia nos clientenan y e comunidad en general,” nan a sigura.

Den mesun linea, nan a informa cu awe ta cuminsa trabaonan di mantencion riba transformer di 20MW den onderstation di Tanki Leendert, cu ta responsabel pa distribui coriente den area aki te Noord. E trabaonan aki ta cuminsa awe 19 di juni y lo culmina dia 26 di juni.

Manera a menciona caba, nan ta realisa trabaonan di mantencion sin interumpi servicio di coriente manera esun aki, unda nan ta transferi e carga pa sigui distribui coriente na e area por medio di un otro stacion pa evita interupcion di servicio di coriente (shutdowns). Sinembargo, nan a informa cu e proceso aki ta pone un esfuerso adicional riba e kabelnan di e otro stacion y nan tecniconan ta bay monitoria e situacion aki durante henter e periodo menciona.