Oponentenan awor kier sembra duda cu partido MEP lo mester reemplasa Setty Christiaans-Yarzagaray. Hasta ta specula cu un minister di MEP lo mester baha pa reemplasa Setty.
“Esey no ta e caso. Nos colega Setty ta hospitalisa pa un tratamento pa cual e mester ta bou di observacion. Nos ta desea Setty pronto recuperacion. E tratamento lo termina pronto y nos tin confiansa cu Setty por bolbe atende su trabounan fisicamente den Parlamento. Na e momento aki nos partido no ta pensando mes den reemplasa Setty pasobra Setty ta un tremendo parlamentario y ta haci un tremendo papel den Parlamento. Algo cu bo no por bisa di mayoria parlamentario di oposicion. Setty no ta e prome parlamentario cu ta sufri un kebrante di salud mientras e ta den Parlamento, y lo no ta e ultimo. Ta lamenta si cu oponentenan ta recuri na redashi pa sembra discordia. Pero mi ta sigura henter comunidad cu nos partido ta solido, y lo sigui asina” lider di partido Evelyn Wever-Croes a duna di conoce.
