Rhythms Circus Company Aruba ta un grupo di hoben cu hopi talento cu dia pa dia ta traha pa mustra nan arte den forma di acrobacia, bailamento, actuacion, canto, entre otro. Despues di nan participacion den un di e shownan di talento mas grandi na Merca, nan porta a habri pa sigui progresa tanto na Aruba como rond di mundo.

Den un show yen di luz, musica y cu e presentacion di diferente personahe musical hopi famoso manera Elvis Presley, Michael Jackson, Tina Turner, entre otro, e grupo conforma pa 15 persona di diferente pais a dicidi di mustra nan capacidad artistico na esnan cu ta acerca na e mall Paseo Herencia. Tur dialuna y diaranson for di 7or di anochi e hobennan aki, lidera pa Diego Jaramillo y Yamila Hernandez, ken ta e directornan y e creador di esaki, ta habri e portanan di e ballroom tanto pa turista como pa hende local por experiencia un tiki mas con e show aki ta hinca den otro.

Den un entrevista special cu Bon Dia Aruba a tene cu Yamila Hernandez, el a conta cu e proyecto aki a cuminsa na 2010 door di su persona, ken a bin pa traha y despues a dicidi di keda na Aruba pa biba. Eynan el a conoce Diego Jaramillo, ken ta su pareha actualmente y e idea di lanta un compania hunto cu otro artistanan profesional cu e obhetivo di biba di arte a surgi.

E trabao aki ta dificil, manera Hernandez ta afirma. Nan tur ta artista profesional y pa nan e produccion di e show ta algo facil, pero bende e material ey tabata hopi dificil debi cu na e momento ey na Aruba no tabatin hopi show di esaki manera tabatin na Teatro Cristal, Barcelo, Riu y Tamarijn, cu ta esun cu a habri e porta pa nan y nan a cuminsa mustra nan trabao tanto pa television como na otro eventonan.

Na e momentonan aki nan ta ofrece nan show cu musica, coreografia y na final nan tin e parti mas dificil y peligroso, e parti cu hopi hende rond di mundo a wak na television ora nan a bay Los Angeles na Merca pa representa Aruba den e show America’s Got Talent. Den esaki Hernandez a sigura cu ta un show importante pa nan proyecta na e publico presente, debi cu hende por presencia e acto aki cu candela den bibo y directo.

Nan presentacion na America’s Got Talent “tabata increibel” na unda nan a conoce e hurado, otro grupo di artistanan cu tambe a presenta. Nan a clasifica pa e siguiente ronda y nan a firma pa bay Inglatera presentando nan show tur dia eynan pa tres luna. Pero e cansancio y e recarga fisico tabata hopi fuerte, Diego a haya un accidente y debi na esey nan mester a cancela tur nan compromiso.

“Esaki ta un trabao cu bo mester respeta hopi. E circo manera e ta, ta implica hopi riesgo, nos tin cu entrega nos mes, nos mester tin un estado fisico cu no por stop di train, mester tin constancia. Pero si bo ta surpasa e limitenan, bo curpa no ta bay want’e. P’esey den e gira aki ta parce cu nos a surpasa e nivel y Diego a sufri un lesion net ora nos mester a bay firma e siguiente parti di e gira cu America’s Got Talent. Esey tabata algo hopi frustrante pa nos,” el a bisa.

Debi na e unico presentacion cu nan a haci cu America’s Got Talent nan a haya basta propuesta, sinembargo, prome cu esey segun Hernandez a señala nan bay na Hungria, na e Budapest Circus Festival unda nan a conoce empresarionan, hende di teatro y di espectaculonan grandi caminda nan a haya sa con eynan ta respeta e trabao artistico aki.

Despues di esey, nan a dicidi di keda na Aruba pa hende haya sa di kico e trabao aki ta trata y wak nan talento mas di cerca.

Den nan proyectonan, Hernandez a informa cu na juli nan ta bay Italia pa presenta na e programa “Tu si que vales”; na augustus nan ta bay Francia pa e programa “La France A Un Incroyable Talent” y nan ta culmina na november biahando pa China pa presenta na Wuqiao International Circus Festival.

“Esakinan ta giranan cortico di maximo 2 siman, pasobra nos ta comprometi cu nos show na Aruba, pa nos hende di Aruba, pa nos sigui purba di logra e soño di tin e espacio aki y pa e personanan akinan por reconoce e arte cu ta un parti importante di cada pais. Nos ta yena cu hopi orguyo ora nos ta bay otro paisnan y nos ta bisa cu nos ta bin for di Aruba, nos ta sinti cu nos ta representando e arte cu ta hiba e nomber di Aruba na nivel mundial,” Hernandez a informa.

Entregando nan energia y pasion riba escenario dos biaha pa siman, Rhythms Circus Company Aruba kier pa comunidad sinti e tipo di arte aki manera nan como artista tabata sintie na nan pais di origen, na Cuba por ehemplo na unda Hernandez a nace y a bira un profesional artistico cu ta soña cu arte y cultura por haya mas atencion y mas apoyo.

Pa temporada di vakantie, nan ta organisando cierto proyecto pa muchanan, aunke el a sigura cu esaki no ta oficial ainda, nan kier realisa un campamento pa muchanan por bay y explora algo di circo, haciendo malabar, ekilibrio, ehercicionan fisico, unda mayornan por registra nan yiu pa por experiencia un tiki mas loke e artistanan di Rhythms Circus Company Aruba ta haci. Despues cu nan caba cu e actividad ey, e muchanan tambe ta bay haya e oportunidad di wak e show.

Pa finalisa, Hernandez a haci un solicitud na e pueblo Arubiano pa apoya nan den e proyectonan cu nan ta haci: “Nos tin e intencion di haci algo pa e isla cu ta bay agrega mas balor di loke e tin caba, pasobra ta hopi bunita ora un turista ta bin disfruta di e beachnan y tambe por disfruta di un luga rico den cultura. Cu nos arte, cu nos talento, cu e trabaonan di tur artista Arubiano.”