Dialuna proximo, Stichting Hunto ta bay cuminsa realisa varios actividad relaciona cu traficacion ilicito y abuso di droga. Entre nan, ta bay tin tres anochi informativo y un caminata, esaki den conexion cu Dia Internacional Contra Traficacion Ilicito y Abuso di Droga 26 di juni.

Den esaki, Michelle Lont ken ta fungi como trahado social, a comenta cu e anochinan informativo ta bay cuminsa for di dialuna 19 di juni unda nan ta bay duna informacion pa famia cu e topiconan como señalnan di relapse y con por yuda un ser keri cu ta sufri di adiccion, ademas di tips pa reconoce ki ora un familiar ta haci uso di substancia of alcohol y kico por haci na e momento ey y despues, ora nan ta den etapa di recuperacion.

Nan a manda e invitacion pa famianan di e clientenan cu ta den Centro Colorado, pero tambe nan ta invita persona cu tin sospecho di un familiar cu por ta adicto y tambe pa personanan cu por tin mas interes den tema aki.

“Tin biaha nos ta traha cu e cliente, pero tin biaha e famia ta keda atras y ta hopi bon pa nos duna nan e tips,” Lont a señala.

Tin un indicacion cu mas hoben ta drentando den mundo di accion despues di pandemia di Covid-19 y debi na esey, nan ta bay enfoca riba con por reconoce ora un persona cu recientemente a cuminsa haci uso di substancianan, ora ya caba tin tempo den adiccion y tambe den etapa di recuperacion, nan kier haci enfasis den e tres punto aki den e anochi di informacion aki.

Pa diamars 20 di juni e informacion ta dirigi pa tur persona cu ta traha den veld como trahadonan social, NGO’s, dokternan di cas, docentenan pa motibo cu nan kier informa di kico Stichting Hunto ta haci y con ta e proceso pa un persona drenta den centro y kico ta tur e yudansa cu nan por duna como fundacion.

Den esaki nan ta bay papia tocante e protocol pa usa, na unda mester referi un persona y clientenan cu trastorno mental.

Pa dia 23 di juni nan ta invita tur hende den comunidad pa splica e yudansa cu e fundacion aki ta brinda y conhuntamente cu FADA nan ta bay splica topiconan tocante traficacion ilicito y abuso di droga y kico ta e topiconan nobo debi cu tin biaha pa nan cu ta traha den area sa ki tipo di droga nobo tin, por ehemplo, tambe nan ta bay splica kico ta considera como adiccion como alcohol.

Topico di salud mental ta keda un preocupacion pa nan como fundacion na unda nan ta mira cu adiccion ainda na Aruba no ta considera como un malesa y e ora ey Lont a señala cu nan sa caba cu pa hopi aña e ta un malesa mental unda lunanan pasa nan a haci e estudio di Mental Health Professional, e cual ta trata di un estudio intensivo di 140 ora dirigi na profesionalnan pa por brinda ayudo y cuido necesario pa loke ta trata salud mental.

Den estudio aki nan a haya diferente hermentnan unda adiccion tambe ta cay den parti aki di salud mental y p’esey nan no por laga e topico aki afo.

E tres anochi informativo ta bay tuma luga na Santa Teresita Center na San Nicolas for di 6:00pm te cu 8:00pm y entrada ta keda gratis.

Segun con e tres dia aki lo bay na San Nicolas nan tambe kier haci e mesun charlanan den otro districtonan di Aruba, segun Lont a sigura.

Nelisabel Angela a anuncia cu nan ta bay haci un caminata di 5 kilometer dia 25 di juni, e ta esun cu ta coordina e actividad aki y a informa cu esaki ta bay cuminsa 6:00am na Centro Colorado unda diferente profesional tambe ta bay ta presente e dia aki pa yuda cu e actividad.

Na yegada ta cuminsa cu un Zumba di 15 minuut y e caminata mes ta cuminsa 6:30am. Hende cu ta bay asisti tin e oportunidad di gana diferente premio, segun Angela a sigura.

IBiSA ta e instancia encarga di bende e ticketnan di e caminata aki, tambe ta disponibel na FADA y na Centro Colorado.

Angela a sigura cu esaki ta un actividad dirigi na tur hende cu por asisti cu nan famia y amigonan, personanan cu bicicleta, auto of pickup tambe ta bay ta presente por si acaso un persona mester di ayudo “e ta un caminata y no un competencia pa famia y amigonan pasa un rato leuk, ta bay tin coy bebe y e premionan ta bay ta hopi interesante.” Angela a bisa.

Stichting Hunto ta un cooperacion entre un SPD (Departamento Social Psikiatrico) y Fundacion pa Maneho di Adiccion Aruba (FMAA) unda nan ta enfoca riba e parti di adiccion y psikiatria basico ubica den un solo luga, esey ta e idea pa nan por brinda un miho servicio na comunidad.